Shillong, Naitung:
Ka Meghalaya Pradesh Congress Committee (MPCC) kan pynkup burom ïa u MP ka Tura Parliamentary konstitwensi, u Saleng A. Sangma uba la jop donburom ha kane ka ilekshon ba la dep sha ka Lok Sabha.
Ka jingpynkup burom ïa u Sangma kan long ha ka 6 tarik Naitung ha U Soso Tham Auditorium ha ka por 2 baje nohphai sngi.
“Ngi sngewbha ban pyntip sha phi ba ka MPCC ha ka jingïalang kaba la long mynta ka sngi ha ka jingdon ryngkat jong ki nongmihkhmat na ka Youth Congress, Mahila Congress, ngi la rai ban pynlong ïa ka jingpynkup burom ïa u Saleng A. Sangma, u MP ba dang shuh sha jied shah ka Lok Sabha na Tura ha ka 6 tarik u Naitung ha U Soso Tham Auditorium,” la ong u nongïalam ka MPCC, Bah P.N. Syiem.
U la ong ruh ba ha kane ka jingpynkup burom, la khot sngewbha ïa baroh ki nongkitkam bad ki nongtrei ka seng naduh ka MPCC, DCC, BCC, longkmie, samla ban ïa poi lang ha katei ka sngi pynkup burom ïa u MP.
