Shillong, Naitung 10
U Chief Executive Member (CEM) ka Khasi Hills Autonomous Dis-trict Council (KHADC) Bah Pynïaid Sing Syiem ha ka Sngi Balang u la ong ïa ka Hynñiewtrep National Liberation Council (HNLC) ba kan da wad bniah shwa ki jingtip ha shwa ban kynnoh ingkhong shyllangmat bad byrngem.
“Wad shwa ïa ki jingtip ha shuwa ban byr-ngem bad ban kynnoh ingkhong shyllangmat ïa nga. Ha shwa ban byr-ngem, sngewbha wad shwa ïa ka jingtip bad ynda phi la tip ïa ka jingshisha, lada phi byrngem, lada phi ong nga dei u ingkhong shyllangmat ruh ngam sngew eiei,” la ong u Bah Pynïaid.
Ïa kane ka jingkynthoh u CEM u la pynpaw hapoh ka dorbar lyiur jong ka Council kaba dang ïaid shakhmat, kata haba ïashimbynta ha ka jingïatai halor ka kynrum-kynram kaba la mih hapoh ka Hima Sohra namar ka jingpynkha ïa ka Raid Majai.
U Bah Pynïaid u la pyntip ba u la shah kynthoh bad ka Executive Dorbar jong ka Hima Sohra bad u la shah byr-ngem ruh ha ka HNLC hadien ba ka district council ka la tuklar ïa ki kynrum-kynram kiba mih namar ka jingïoh dulir ki bar jylla hapoh ka thaiñ Majai.
Lah ban pynkynmaw ba ka HNLC ha ka 4 tarik Naitung, ka la byrngem ïa u CEM ka KHADC ba u dei ban pyndam noh mardor ïa ka jingpynbna (Notification) ba la pynmih kaba ai jingithuh ïa ka Majai kum ka Raid.
U Bah Pynïaid u la ong, “Ban shu kynnoh ingkhong shyllangmat ka suk eh hynrei ynda ïapeit ïa kine ki kam ba ngi leh hangne, phin kylli ma phi ko HNLC, kham ieid jaidbynriew ma nga ne mano.” U la ong, “Nga kwah ban phah ïa ka khubor kaba shai ba ngi shong hangne da ka jingsngewkhia bad ka jingkitkhlieh, namar kata aiti ha ngi ka EC bad ka Council ba ngin leh ïa kaei kaba bha tam na ka bynta ki Hima ha kylleng ki jaka”.
Ha kaba ïadei bad ka Executive Dorbar ka Hima Sohra, haba kren sha ki lad pathai khubor hadien ba la wai dorbar, u Bah Pynïaid u la pyntip ba ka District Council ka la aipor haduh ka 15 tarik ïa u Syiem ka Hima Sohra ba kan pynphai noh ïa ki dulir pata khyndew kaba la dep ban ai sha ki bar jylla ha Majai bad ban wan pynphai noh sha ka council lane ban pynduh pyndam noh ïa ki dulir pata hakhmat jong ka council. U Bah Pynïaid u la ong ruh ba lada ym lah ban leh ïa kane ka jingbthah na ka liang jong ka council kan hap ban shim hi noh ïa ka bor ha kti lajong ban leit khynra bad knieh lut ïa baroh ki jaka katkum ki record kiba don bad ka council.
Halor ki kynrum-kynram bad ki jingshah kynthoh, u la pyntip ba ka jingpynmih Order ha u snem 2024 da ka EC ka KHADC ka dei ban pynïap noh ïa ka Order kaba la pynmih ha u snem 2020, kaba la plie bad pyllait ïa ki jingpyrkhing kiba la buh kyndon ïa ki hima khamtam ha kaba ïadei bad ka shnong Majai, ha kaba la ai NOC ïa ki bar jylla, ai dulir ne kot khyndew pata ïa ki bar jylla ha Majai.
U la ong ba ha ka Order jong u snem 2019 ki la don bun ki kyndon kiba la bsuh na ka bynta ka bit ka biang bad ban pyrkhing ïa ki bar jylla ba kin ïoh long trai ha Majai hynrei ka Order ba la pynmih ha u snem 2020, ka la weng noh ïa ki kyndon naduh kaba 3 haduh 11. Kumta kane ka Order ba la pynmih ha u snem 2024 ka la pynim biang ïa kine ki kyndon kiba la shah weng bad ka kyndon kaba 3 ruh kaba la don ka jingithuh ïa ka Raid Majai.
U la ong ba ka District Council kam lah ban shna Raid thymmai khlem ka jingpynskhem na ka Hima, hynrei haba peit ïa ka histori ïa ka jingïaid lynti ka Hima Sohra, ka la don ka jingpynskhem na ka liang jong ka Hima ïa ka Raid Majai.
