Jowai, Naitung 10
U Chief Executive Member jong ka Jaiñtia Hills Autonomous District Council (JHADC), Bah Thombor Shiwat u la ong ba ka jingkynnoh buhrieh ïa ka pisa ka konsil kaba T.20 klur da u Organising Secretary ka Voice of the People Party (VPP) u Bah Damewanhi Rymbai ka long kaba bakla bad ka bym nongrim haei-haei.
“Une u Organising Secretary ka VPP, uba la shu thad ïa ka burom ka ijot jong nga shimet bad ka konsil, u dei ban panmap paidbah hapoh shitaïew halor kane ka jingkynnoh kaba khlem nongrim jong u, lym kumta ngam banse ban ïaid katkum ki lynti jong ka aiñ,’ la ong u CEM ka JHADC bad bynrap ba kane ka pisa ka dei jong ka konsil (Council Own Fund).
“Ha kum kane ka pyrthei shai mynta kaei kaba ngin buhrieh, haba ngi ïoh pisa ngi la ïathuh ba ka Sorkar ka la pyllait bhah pisa bad u don hok aïu ban tuklar ïa ka jingtreikam jong ngi. U paidbah u la jied ïa ngi ban ngin pyndep hok ïa ka kamram bad ban pynïaid ïa ki kam ki jam ka konsil kaba la bynshet ha ngi,” la ong shuh shuh u CEM.
U CEM u la ban biang bad kubur ba ka konsil ka don ha ka khim ka khait bad kim shym la shong kli-kti ban ïasaid na ka bynta ban ïoh pynmih ïa ka tulop ki nongtrei ka konsil. Ka pisa kaba ïoh na ka sorkar ruh ka dei ka bhah jong ka konsil bad la mang ban siew ïa ka tulop ki nongtrei da ki klur tang na ka bynta shibnai, kumta ka Treasury ruh kan ym lah hi ban pyllait mynta mynta ïa ka pisa baroh, la ong u Bah Thombor. Nalor nangta u la kynthoh ruh ïa une u nongïalam ka VPP ban kren ïa kano-kano ka kam dei ban kren da ka rukom bad ban pyrkhat rangbah ym ban shu kren khlem ki sakhi ki satar bad pynjah burom ïa kiwei, la ong shuh shuh u CEM Bah Thombor.
Na ka liang ka Secretary Executive Committee, JHADC, Kong B Bamon, ka la ong ba baroh ki tip ba ka pla tyngka jong ka konsil ka hiran bad kano-kano ka pisa kaba ïohlum la pynïaid sha ka tulop.
Ka pisa kaba ïohlum na ka sorkar jylla dangshen bad kumjuh ka T.20 klur kaba dei ka pisa ba ïohlum ka konsil (Council Own Fund) kaba la kynnoh ba buhrieh u CEM da ka seng VPP ka long kaba bakla bad kam don satia kano-kano ka jingpyndonkam bakla ïa ka pisa jong ka konsil, la ong ka Secretary Executive Committee ka JHADC.
Ka la bynrap ruh ba naduh ki ophisar bad ki EC baroh kawei ki ïa trei shitom miet bad sngi ban ïaleh ban ïoh ïa ka tulop. Haduh mynta la ar bnai la lah ban siew ïa ka tulop bad shen yn pyllait sa shibnai.
