Shillong, Naitung 10
Ka ïingdorbar jong ka Khasi Hills Autonomous District Council (KHADC) ha ka Sngi Balang kaba dei ruh ka sngi sdang jong ka dorbar lyiur, ka la mynjur ïa ka rai ban phah shwa sha ka Select Committee ïa ka kaiphod jong ka Delim-itation Committee, na ka bynta ban pynbit pynbiang bad peit bniah bha shwa halor ka jingpynbeit thymmai ïa ka jingdon ki nongthep ‘vote’ bad jinglong-jingman ki constituency ha ki 29 tylli ki constituency ka rilum Khasi.
Ha kane ka sngi, u Deputy CEM ka KHA-DC u Bah Pynshngaiñ N Syiem uba khmih ïa ka tnat Elaka, u la wanrah ïa ka kaiphod jong ka Delimitation Committee hapoh ka ïingdorbar, ïa kaba ka Executive Co-mmittee jong ka Council ka la ïoh pdiang ha ka 8 tarik u Naitung, 2024.
Hynrei haba la mih ka jingpynsngew ba ka dang donkam ban khmih bniah naba kum ki dkhot ka ïing kim shym la ïoh ban peit bad pule bniah ïa ka kaiphod kaba ki dang shu ïoh ha kane ka sngi bad don kiba ïoh hynnin ka sngi bad ruh khnang ba kan nym mih ki jingeh ne kynrum-kynram ynda la mynjur, bad pynpaw ba donkam ban phah shwa sha ka Select Committee ba peit bniah.
Kumta na ka liang u Deputy CEM ryngkat ka jingmynjur lang jong baroh kawei ka ïing, la shim ïa ka rai ban phah shwa sha ka ‘Select Committee’, ha kaba yn khlieh hi da u Deputy CEM Bah PN Syiem, uba bat ïa ka tnat Elaka. Kiwei pat ki dkhot kiba la shah kynthup lang ki long u Nongïalam ka Liang Pyrshah Bah Titosstarwell Chyne, u Bah Jambor War, u Bah Bindo M Lanong, u Bah Lambor Malngiang bad u Secretary ka Executive Committee kum u Member Secretary.
Ha shwa kane, u Nongïalam ka Liang Pyrshah, Bah Titos W Chyne u la ong ba kam dei satia ba ki pyrshah ïa kane ka kaiphod hynrei ka daw hi ka long ba kim pat ïoh ban peit bniah bha bad nalor ruh ba kam don ruh ka jingkdew shai ïa ka jingdon ki nongthep ‘vote’.
“Ka thong jong ka Delimitation Committee ka long ban pynbeit thymmai khnang ba ka jingheh jingrit jong ki constituency kin nym ïapher than ne long mar katjuh ka jingbun ki nongthep vote. Hynrei namar ba ka Committee ka khlem kdew satia ïa ka jingdon ki nongthep ‘vote’ ha man ki constituency, kumta khnang ban ailad ïa ki dkhot jong ka ïing ban pule bad bishar bniah shwa ïa ka kaiphod, donkam ban phah shwa ïa ka sha ka Select Committee,” la ong u Bah Titos.
Ha kajuh ka por u Bah Titos u la pynshai kdar ruh hapoh ka ïing ba ka jingbym pdiang ïa ka kaiphod kam mut satia pat ba ka Liang Pyrshah ka pyrshah ïa kane ka kaiphod jong ka Delimitation Committee kaba wanrah hapoh ka ïingdorbar hynrei ka long naba ka EC ka la wanrah kyrkieh ïa ka kaiphod khlem da aipor ïa ki dkhot ka ïing ban pule bad bishar bniah.
Na ka liang u Deputy CEM ruh u la pynpaw ba yn ïaleh katba lah ban pyndep kloi ïa kane ka jingbishar bniah hapoh ka Select Committee.
