Shillong, Naitung 10
Ka khubor ba la ïohlum na ka tnat pulit lyngba ka ‘Website’ jong ka ha ka Sngi Balang ka ïathuh ba u Bah Hawa Samira Paswet u la ujor ba ha ka 6 tarik Naitung hapdeng 11:30 mynstep bad 12:30 mynsngi, uwei u briew ba la tip kyrteng kum u Rupert Lyngdoh, u la khanglad ïa ki nongtrei ka tnat Transport ba kin leh ïa la ka kamram ha Laitumkhrah.
Ha kajuh ka por, la ujor ba utei u Rupert Lyngdoh u la timsih-timsang ruh ïa ki nongtrei ka tnat Transport bad byr-ngem ban thang ïa ka thanat Laitumkhrah.
Lah ban kdew ba katei ka jingjia ka la mih hadien ba na ka liang ka tnad Enforcement jong ka Transport ha ka Sngi Saitjaiñ, ka la pynlong ïa ka jingtalasi ïa ki kot ki sla kiba donkam na ka bynta ki thuk-thuk ar shaka kiba kamai kum ki Rapido hynrei kiba khlem don pat ïa ki kot ban pynshisha ba ki don ïa ka Permit ban kamai.
Ka tnad Enforcement ha ryngkat ki Inspector ki la pynlong ïa ka jingtalasi ha ki bynta bapher-bapher jong ka nongbah kum ha Beat House Laitumkhrah, Malki, Dhankheti, Fire Brigade bad kiwei-kiwei ha kaba la ïoh ban bat ïa katto-katne tylli ki thuk-thuk kiba kamai Rapido ha kaba ki don kiba ïaid lyngba ka ‘Online’ bad ki don pat kiba ïaid lyngba ka ‘Offline’.
Hynrei hapdeng ka jingtalasi ïa ki kot ki sla bad ka ‘Permit’, la don uwei u briew uba kyrshan ïa kiba kamai Rapido uba la wan shakhmat ban pynpaw ïa ka jingpyrshah da kaba tim ruh da ki ‘tien sih ‘tien sang ïa ki pulit jong ka Enforcement bad uba la byrngem ruh ban pynkulmar na ka daw ka jingshah bat jong ki katto-katne ngut ki khynnah kiba kamai thuk-thuk ar shaka lane kum ki Rapido.
Ka thma ktien ka long kaba jur bad ha ka dur khih la ïohsngew ruh ba une u samla u la dawa na ka tnad Enforcement ba kan pyni ïa ka jingthoh kaba ka la dep ban pynbna paidbah.
Une u samla u la dawa ba ki briew ka tnat Enforcement ki dei ban pynphai noh ïa baroh ki shabi kiba ki lah bat kiba dei jong kitei ki khynnah kiba ñiah thuk-thuk ar shaka kiba kamai kum ki Rapido.
