Shillong, Naitung 11
Hadien ba la jia ki jingkhynra ïa ki nongtrei bylla ha kylleng ki jaka ha ka kyrteng jong ka jingbym treikam ka ILP bad kiwei ki aiñ, ka jingïakren ha ryngkat ki jingkylli ka la mih ha kaba ïadei bad ka rukom wanrah ïa ki briew kiba nabar ban pyntrei bylla la ka dei da ki kontraktor trai muluk ne kompani kiba ïoh ban pyntrei ïa ki jingtei jingshna bad ki projek bapher bapher.
Ka jingkylli ka la mih ruh ïa ki kontraktor kiba ju wanrah nongbylla khlem da bud ïa ki kyndon jong ka aiñ kumjuh ruh ïa ki tnat ba dei khmih kiba khlem shimkhia ban leit peit leit khmih hashen.
Haba ïakren bad ki ophisar bad ki heh pulit, ki la pynpaw ba ki pulit ka Jylla man la ka por ki ju shah kynnoh ba kim peit ne pyrkhing ïa ki briew kiba wan trei bylla sha kane ka Jylla, hynrei ka kamram jong ki pulit ka dei ban peit ïa ka suk ka saiñ namar ki don da kiwei pat ki tnat treikam bad ki bor ba dei khmih ban peit ïa ki briew kiba wan trei sha kane ka Jylla.
“Ka aiñ ka la don ha kaba ki nongpyntrei ïa ki kam la ka dei ïa ki kontraktor ne kompani ki hap ban pynrung kyrteng haba ki don ki nongtrei bylla kiba wan nabar Jylla,” la pynpaw uwei na ki ophisar.
Ki don shibun ki kam kiba tang ki nongbylla trai muluk kim pat lah ban trei bad kim pat janai ha ka kam ha kaba ki nongpyntrei ïa ka kam, ki donkam beit ban wanrah da ki nongtrei kiba la kham shemphang bad kham janai ha ka rukom treikam.
“Ka jingkylli ka long, hato tang ki nongbylla trai muluk ngi la lah lut ban trei ïa ki kam khamtam lada pyntrei ïa ki jingtei jingshna bad ki projek bapher bapher?” la kylli uwei na ki nongpynwandur (architecture) ïa ki jingtei jingshna uba na kane ka Jylla.
U la pynpaw ba ha kano-kano ka jylla ne ka ri, ym don kaba la biang lut tang ki nongtrei bylla napoh ka jylla lajong, namar ka jingtbit ban trei ïa ki kam ka dei ruh ka sap kaba don ha kiba bun ki briew.
U la ong ba haba ka aiñ ka don, donkam ban bud ïa ka da baroh naduh ki tnat ba dei khmih jong ka Sorkar haduh ki kontraktor ne kompani kiba pyntrei ïa ki kam.
Haba kylli na ki katto-katne ngut ki kontraktor shimet kiba ju pyntrei ïa ki kam jingtei jingshna, ki la ïathuh ba kumba ka long mynta, ka don ka jingkyrduh nongtrei bylla namarba tang ki nongbylla trai muluk ym pat lah ban pyndap ban leit trei ha ki jingtei jingshna kiba phah trei da ki riewshimet khlem pat ïakren ïa ki projek kiba phah trei da ka Sorkar.
“Ngi don katto katne ki kam ban tei ïing thymmai hynrei man ka por ngim lah ban pynsted ïa ka kam namar duna nongbylla. Nalorkata, ynda la dei ka por ban leh janai ïa ki kam ha shwa ban pyndep ïa ka projek, ngi donkam ruh ïa ki briew kiba la shemphang bad kham tbit ban leh janai ïa ka kam, kata ruh ngi dang duna kum ki trai jylla bad ngi donkam ban ïoh da kiwei pat ki nongbylla kiba nabar jylla namar ki don ka jingshemphang bad jingtbit ban trei,” u la ong.
Kumta u la ai jingmut ba ki trai jylla ki dei ban mih shakhmat ban pyntbit ha ki kam bapher bapher khamtam ban long kiba shemphang bad tbit ban trei janai ym tang ban shu nang malu-mala.
U la bynrap ba lada ki don bun ki trai muluk kiba nang ha ki kam ban leh janai, ym donkam shuh ban khot da kiwei pat ki briew kiba tbit ïa ka kam kiba dei na kiwei ki jylla.
