Shillong, Naitung:
Ka BJP Meghalaya ka la pynlong ïa ka jingïalang jong ka State Executive ha ka Lah Sngi U Blei ha ryngkat ka jingdonlang u Myntri Khynnah ka Sorkar Pdeng u George Kurian bad kane ka jingïalang ka dei kaba nyngkong hadien ka ilekshon Lok Sabha.
U Kurian haba la wan kum u Myntri Sorkar na ka bynta ki kam kiba ïadei bad ka tnat ri jingri, u la ïashimbynta lang ha ka jingïalang jong ka State Executive kaba la pynlong ha shlem treikam ka BJP ha nongbah Shillong ha kaba la la don lang bun ngut ki nongïalam kynthup ïa u President u Rikman Momin, ki MLA ka BJP kiba kynthup ïa u Bah AL Hek uba dei u Myntri Sorkar bad u Bah Sanbor Shullai nalor kiwei kiwei ki nongkitkam ka BJP.
Ha kane ka jingïalang, shibun ki jingthmu bad ki kam na ka bynta ban kiew ka Jylla bad ki kam pynroi la ïakren ha kaba la wanrah ruh ïa ki jingkdew lynti ban pyntikna ba ki jingangnud ka Jylla kin urlong lyngba ki mat treikam jong ka Sorkar Pdeng.
Ha kawei na ki mat ïakren ha kane ka jingïalang, na ka liang u Bah Hek u la pynsngew bad kyrpad ïa ka Sorkar Pdeng lyngba u Myntri Khynnah uba wan sha kane ka Jylla ban rah lang ïa ka mat jingdawa jong ka Jylla, kata ban ithuh noh ïa ka ktien Khasi bad Garo hapoh ka Khyrnit Baphra jong ka Riti Synshar ri.
U Bah Hek u la ong ba ka jingpynrung ïa kine ki ktien kan pynurlong ïa ka jingdawa kaba la slem jong ka Jylla bad kane kan long ka jingmyntoi ha ka pule puthi na ka bynta ki samla pule bad kan ïarap ruh ban kham pynbha ïa ka lawei.
Na ka liang u George Kurian u la ong ba ki don shibun ki skhim na ka bynta ka Jylla Meghalaya kiba la pynkhreh da ka Sorkar MDA kaba ïalam da u Narendra Modi ha kaba u la batai ba ki don ruh ki skhim kiba bun kiba lah ban nang pynbha ïa ka rukom ri jingri bad ri dohkha ha kane ka Jylla bad kan ïarap ruh ban kyntiew ïa ka jingïoh kamai jong ki briew kiba donbynta ha kine ki kam.
