Shillong, Naitung 11
Ka Federation of Khasi Jaiñtia and Garo People (FKJGP) Sengkmie ka pynrem jur ïa ka jingkren laplah bad jingkren khyllung khynnah jong u Myntri Rangbah ka Jylla u Conrad K Sangma ban ong ba ‘Ym donkam Work Permit ha Meghalaya’ na ka bynta ki bar jylla kiba wan ban bylla sha ka jylla hynrei da kaba shu tap eit miaw ba ki dei tang ban shu pynrung kyrteng ha ka tnat Labour.
Ha ka kyrwoh khubor ba la pyllait da u President Bah Dundee C Khongsit u la ong, ka seng ka buh ka jingkylli ba hato u Conrad K Sangma kum u Myntri Rangbah ka Jylla, hato um tip mo ba ïa ka Inter-State Migrant Workmen (Regulation of Employment and Conditions of Service) Act, 1979 (Work Permit) ka dei ka aiñ kaba la dep ban mynjur bad pyntreikam naduh ka 28 tarik Naitung 2011?.
Ka FKJGP ka sngew ba lada kat uta u khlieh nongsynshar jong ka jylla um pat tip bha wat ïa ki aiñ kiba la don lypa, kumta kum ka jaidbynriew bad kum ka jylla kumno yn dang shaniah ha kum kitei ki nongïalam kiba pyrshang ban ïalam bakla ïa ki paidbah tang namar ka jingkwah ban ailad bad ban ïada ïa ki mynder kiba wan rung kyrthep sha kane ka jylla na ka bynta ka jingmyntoi ha ka saiñ pyrthei ban pynlong ‘Vote Bank’ da ki mynder na ka bynta ban skhem ka shuki lajong.
Utei u nongïalam u la ong, kum ka seng ka dang khmih lynti ba lyngba ka jingpynkup bor jong u paidbah ba kita kiba don ha ka bor synshar kin shakri ïa ka jaidbynriew bad ïa ka jylla hi baroh kawei. Phewse wat ïa ki aiñ kiba la don lypa ruh ki dang pyrshang ban pynjah klep, sa katno tam lei ban pynurlong bad ban buddien sha nongbah Delhi ïa kata ka Resolution ba la dep ban mynjur ha ha ïingdorbar thawaiñ jong ka jylla kum ka Inner Line Permit (ILP), ka jingpynrung ïa ka ktien Khasi ha ka Khyrnit ba Phra jong ka riti synshar jong ka Ri India.
Shuh shuh halor ka jingong jong u Myntri Rangbah ka Jylla u Conrad K Sangma ba ki seng kim don hok ban talasi kot ïa ki nongbylla bar jylla, ka FKJGP ka buh ka jingkylli hato kita ki ‘Infiltration Check Gate’ kin shu long tang ki khyrdop lum khajna jongno-re-jongno bad kita ki Labour Inspector ba la thung ha manla ki Block kin shu pynsyrwa kai ïa ka pisa jong ka sorkar da kaba shu shim tulop ei khlem da treikam satia?.
Ka Sorkar jylla ka dei ban tip bad sngewthuh shai ba kata ka jingpynrung mukotduma 4 tylli pyrshah ïa ki dkhot seng kan ym pyntieng pynsmiej satia hynrei ki dkhot jong ka FKJGP kin ïai long ki nongpeit pyrman ban khanglad ïa ki mynder ban rung laitluid sha kane ka jylla bad ki kynroh jong ki along kin nym pynduh mynsiem satia hynrie ki long ki jingai mynsiem ïa ki dkhot jong ki seng bad kine baroh ki pyni bad pynpaw shai ba kam don ka jingshimkhia na ka liang jong ka Sorkar haba ïadei bad ka mat jong ki mynder.
Kyntang ïawai ka FKJGP ka bthah ïa baroh ki shnat treikam jong ka seng kiba don ha ka jylla hi baroh kawei ban bteng beit ïa ka jingkhynra mynder khnang ba kan long ka jingïada ïa ka jaidbynriew na ka jingshah tyllep bad na ka bynta ka jingshngaiñ ki pateng ban wan.
