Shillong, Naitung 10
Ka sorkar Meghalaya ha ka Sngi Palei ka la plie paidbah ïa ka “Hello Meghalaya” kaba dei ka rynsan OTT (Over The Top) ban pynsaphriang ïa ki phlim, jingrwai bad kiwei kiba pynmih na kane ka jylla.
Ïa katei ka rynsan “Hello Meghalaya” la plie da u Myntri Rangbah, u Conrad K Sangma, ha LARITI International Cen -tre for Performing Arts and Culture.
Naduh mynta ka sngi, ki paidbah ki lah ban peit ïa ki phlim Khasi, Jaiñtia bad Garo, bad kiwei kiba la dep buh ha katei ka OTT.
Kane ka rynsan ka long ruh kum ka lad ban kamai ïa ki ‘riew don sap kum ki nongshna phlim, tyngshop/puron, nongrwai bad kiwei.
Na ka bynta ki nongshong shna phlim, katei ka rynsan “Hello Meghalaya” ka ai T. 5 lak man la kawei ka phlim bad na ka bynta ki phlim kiba la paw ha ka Ri bad shabar, yn ai kham bun ka jingïarap pisa.
Nalorkata, ki nongshna ïa ki dur khih lane ‘video’ (Content Creators) ki lah ban kamai T. 18,000 shi bnai. Kiwei kiba shna ïa ki phlim lyngkot ruh ki lah ban kamai lyngba kane ka rynsan.
Nangne shakhmat lada don ki prokram kum ka jingïalehkai phutbol ha jylla, tamasa jingrwai bad kiwei, yn sa pyni ‘Live’ lyngba katei ka rynsan.
Na ka liang u Myntri Rangbah u la ong ba kum shi bynta jong ka jingpyrshang ban ïoh jingithuh ka ktien Khasi bad Garo, ka sorkar ka don ïa ka thong ban ïada bad kyntiew ïa ki ktien kiba don ha kane ka jylla.
“Kane ka rynsan kan sa wanrah ïa ki jingkylla kiba bun na ka bynta ki nongshna phlim bad nongrwai ha ka jylla jong ngi,” la ong u Conrad. Namarkata, u la kyntu ïa ki paidbah ba kin pynïasoh bad katei ka rynsan bad ban peit ïa ki phlim bad jingrwai ba la pynmih na kane ka jylla khnang ba yn lah ban siew sha ki ‘riew don sap ka jylla.
Shuh shuh u Conrad u la ong ba u la dep ban ïakren bad u Myntri Rangbahduh, u Narendra Modi, halor katei ka rynsan “Hello Meghalaya” ha kaba u Modi u la sngewtynnad shibun bad u la kyntu ban peit la ka don ne em ka lad ban ïatreilang ha ka Ri bad ka pyrthei ha ka liang ka put ka tem, la riti bad kiwei.
U Chief Secretary, Bah DP Wahlang, u la ong ba ka Meghalaya Grassroots Music Project ka kyrshan ïa kumba 3,000 ngut ki nongrwai, nongput, nongtem ka jylla.
Ha kane ka sngi, la aiti ruh ïa ki khusnam “Meghalaya Content Creators Award 2024”. Napdeng kiba ïoh ïa kane ka khusnam ha ki 14 tylli ki kyrdan ki kynthup ïa u Jr Storyteller Lyndon, Green-Tech Foundation, Chiïung, Dr. Kham Chyrmang, Biria Shillong bad kiwei.
