Shillong, Naitung 11
Ka synjuk nongñiah taksi kaba don hapoh ka Pomlakrai Local Taxi & Owner’s Association ha ka 11 tarik u Naitung 2024 ka la leit ban buh da ka jingthoh ha ka shlem treikam u Superintendent of Police (SP), East Khasi Hills District halor ka jingujor ïa ka jingailad jong ka shnong Rngi Shyllong ban pynshlur ïa ki kali shimet kiba kamai na Rngi Shyllong sha Shillong Peak Viewpoint kaba dang hap hapoh ka jingpeit jong ka Raid Laban ban kit ïa ki nongwan jngoh kai pyrthei sha Lum Shillong.
Haba ai jingkren sha ki lad pathai khubor hadien ba ka synjuk ka la wan ban buh ïa ka jingujor, kitei ki nongñiah taksi kamai ki la ong ba kane ka jingïai bteng jong ka shnong ban ailad ïa ki kali shimet ban kamai na Rngi Shyllong sha Shillong Peak Viewpoint ka long kumba ka shnong ka khanglad ïa kiba don hok ban kamai khamtam ïa ki trai kali kiba hap ban siew ïa ka bai khajna sha ka sorkar.
Kitei ki nongñiah taksi kamai ki la ong ba kum ka Association kan nym shong kli-kti ha kaba ïadei bad katei ka kam bad kitei ki nongñiah taksi kamai ki la kyrpad ïa ar tylli ki shnong kiba kynthup ïa ka Raid Laban bad ka Pomlakrai Pyllun ba kin pynbeit noh kham kloi na ka bynta katei ka kam khnang ba kan don ka shongsuk shongsaiñ hapoh ka imlang-sahlang baroh kawei.
Kitei ki nongñiah taksi kamai ki la ong ba ha ka jingïoh jingtip jong ka kynhun, na ka liang ka Dobar Shnong jong ka Rngi Shyllong ka la shong ïa ka jingïalang ha ka 10 tarik u bnai Naitung 2024 bad lada kum ka Dorbar Shnong bad u Rangbah Shnong ka Rngi Shyllong ki dei kiba shemphang bad kiba sngewthuh, ki lah dei ban khot lang ïa ki nongñiah taksi kamai ban ïoh ïakren sha ka miej ka jingïasuk.
Shuh shuh kitei ki nongñiah taksi kamai ki la ong ba kim tip satia ïa ka daw kaba la pynlong ïa ka shnong Rngi Shyllong ban ym shah ïa ki nongkamai taksi ban rung shapoh ka shnong ban kamai bad kit ïa ki nongwan jngohkai pyrthei hynrei ba la shah tang ïa ki kali shimet ba kin kamai.
“Ïa kata ngim lah ban ong namar ba ha ka jingshisha kane ka kam ka dei ban wan ha hapoh ka Pyllun hynrei ka Rngi Shyllong pat ka la shimkam tang marwei. Ka sngew ba ka dei ka jaka tang jong ka Rngi Shyllong hynrei ha ka jingshisha haba katei ka jaka ka dei jong ka Pomlakrai Pyllun baroh kawei kumta kane ka kam ka dei ban poi hapoh ka Pyllun bad ka Pyllun hi kan bate ïa ka kam hynrei ka Rngi Shyllong pat ka la leh donbor hi marwei”, la ong kitei ki nongñiah taksi kamai.
