Shillong, Naitung 11
Ka Sorkar Jylla lyngba u Myntri Rangbah u Conrad K Sangma ka la lum ïa ki nongkitkam shnong jong ka Greater Shillong bad kiwei pat ki nongdonbynta na ka bynta ban phylliew jingmut lang halor ki kam ban wanrah biang ïa ka khuid ka suba ha ki shnong bad pynkhie im ïa ki wah ha ki jaka sor.
Ki Rangbah Shnong bad kiwei pat ki nongdonbynta ki la ïashimbynta ha ka jingïakynduh ban phylliew jingmut ha kaba la donlang u Symbud Myntri Rangbah uba peit ïa ka tnat pynroi sor u Bah Sniawbhalang Dhar, u Chief Secretary Bah DP Wahlang nalor ki ophisar ka tnat pynroi sor.
Ha kane ka jingïakynduh lang, la pyni ruh ïa ki jingbatai bad ki sienjam ban pynkhuid bad pynkhie im ïa ka Wahumkhrah bad ki sienjam kumno ban tehlakam ïa ki jaboh jabaiñ, bad la ïatai halor ki sienjam nangne shakhmat lyngba ka jingdonbynta lang ki shnong ki thaw.
U Myntri Rangbah u la ïakren pashat jingmut ruh bad kiba la wan sha ka jingïakynduh lang bad shim katto katne tylli ki jingkylli ha kaba kaba ïadei bad ki lad ban pynitynnad, ban pynkylluid bad tehlakam ïa ka jingjaboh nalor ka bynta kaba dei bad ki nongdie madan.
