Shillong, Naitung:
Ka Employment Monitoring Cell jong ka Khasi Students’ Union (KSU) ha ka Lah Sngi U Blei ka la leit ban pan jingpynshai na ka Meghalaya Public Services Commission (MPSC) halor ka jingpynmih risol jong ka post Statistical Officer ha ka tnat Animal Husbandry and Veterinary (AH&Vety).
Ha kane ka sngi, ki nongïalam ka Employment Monitoring Cell ka KSU ki la leit ban ïakynduh ïa u Chairman jong ka MPSC ban pan jingpynshai halor ka jingpynmih risol ba la jied ar ngut wat la ha ka jingpynbna la ong ba lait tang kawei ka kam.
Kane ka jingdawa jong ka seng ka long hadien ba la ïohi ba ka MPSC ka la jied ïa ar ngut ki samla, uwei na ka thup Khasi-Jaiñtia bad uwei na ka thup Garo katkum ka jingpynbna (notification) ba la pyllait ha 27 tarik, Jylliew, 2024.
Ha ka kyrwoh ba la pyllait da u Information & Publicity Secretary ka KSU u samla Pynshai Rani u la ong, “Ka seng ka pynpaw ïa ka jingsngew lyngngoh naba katkum ka jingpynbna ne Advertisement ba la pynmih ha ka 14.12.2020 pat, ka jinglaitkam ka dei tang na bynta kawei ka post bad ïa kane la pynskhem biang da ka jingpynbeit (Corrigendum) ba la pynmih ha ka 14.09.2022 kaba dei ban long thik tang ïa kawei ka post na bynta thup Khasi-Jaiñtia.”
Shuh shuh ka kyrwoh na ka KSU ka la ong ba na ka liang jong ka MPSC ka la pan por ban ai jingpynshai halor kane ka bynta, ha kaba na ka liang jong ka seng ruh ka la maham ba ym pat dei ban thung ïa kane ka kam katba ym pat ïoh ïa ka jingpynshisha.
