Nongpoh, Naitung:
Ka Armed Police Training Center (APTC) jong ka 6th Battalion ka Meghalaya Police kaba don ha Umran, Ri Bhoi District, ha ka Sngi Ba-ar ka la ïoh ban sakhi ïa ka Passing Out Parade jong 104 ngut ki Unarmed Branch Recruit Constables (UBRC).
Ka Director General of Police ka jylla, ka Kong Idashisha Nongrang, ka la wan ban shim ïa ka bynta kum ka kongsan ha kane ka sngi ha ka jingdon lang jong u Commandant jong katei ka jaka ai jinghikai, u Rituraj Ravi lem bad kiwei kiwei ki heh pulit ka jylla.
Ha kane ka sngi la wan ruh ban ïadon ryngkat da ki bahaïing bahasem jong ki samla kiba la pyndep ïa ka jingshah hikai ha katei ka jaka bad ki ban sa rung kam noh shen ha ka tnat pulit ha ki jaka bapher bapher jong ka jylla.
Haba kren ha kane ka sngi, ka Kong Idashisha Nongrang, ka la pynpaw ïa ka jingsngew sarong bad ai khublei kyrpang ïa ki 104 ngut ki samla kiban sa rung kam ha ka tnat Unarmed Branch ryngkat 7 ngut ki nongbud lane kita ki follower jong ka tnat pulit ka jylla. “Nga sngewtynnad ban pdiang sngewbha ïa phi baroh sha ka ïing ka sem jong ka tnat pulit ka jylla Meghalaya,” la ong ka Kong Nongrang.
Ka DGP ka la pynpaw ruh ïa ka jingsngewkmen ban ïohi ba mynta ka kynti, ki la don bun ki samla kiba don wat ïa ki kyrdan ba heh bad kiba la pyndep ïa ka graduate bad post-graduate kiba la pyndep ïa kane ka jingshah hikai, ym kum ha ki por kiba mynshwa ba kham ñiar eh kiba la heh kyrdan ki ban rung kam kum ki langrut ha ka tnat pulit.
Ka ai jingïaroh ruh sha ka APTC Umran, ki nonghikai bad baroh kiba la ïadon bynta ha kane kam, halor ka jingtrei shitom ka jong ki ban ai ïa ka jinghikai kaba paka tam sha kine ki pulit ki ban sa rung kam shen hapoh ka tnat pulit jong ka jylla. Ka kyntu ruh ïa ki ban sa rung kam noh shen ba ynda haba ki la don ha ka kam, kin sa ïoh ïa ka lad ba kin pyntreikam ïa ki jinghikai kaba ki la ïoh bad pynpaw ruh ba kin sa shem ba ki don ki bynta kiba pher ruh na ka jinghikai kaba ki ïoh, hynrei ba ki dei ban bud ïa kaba bha tam bad ka dei ha ka jingim ka jong ki da kaba bud thik ïa ki kyndon kiba la buh.
Ka Kong Nongrang ka ong ruh wat la ki jingeh ki don hapoh ka tnat pulit, hynrei kaba kongsan ka long ban pynïahap bad pynïadei katkum ka jingïaid ka por bad ban kohnguh sneng ïa ki jinghikai kiba ki la ïoh.
Ka Kong Nongrang ka kyntu ruh ïa kitei ki pulit thymmai ki ban shimti ïa ka kam ba kin bud thik ïa ka jingshah hikai la ki dei kiba la don ka kyrdan ne kiba wan na ka longïing kaba kumno-kumno ruh bad kyrmen ba kin long ka jingshai ha kam kaba ki trei lashai lashisngi.
