Jowai, Naitung 11
Ka jingpynbeit thymmai ïa ki constituency da ka Delimitation Committee jong ka Jaiñtia Hills Autonomous District Council (JHADC) ka la wanrah ka jingpyrshah kaba jur na ki shnong hapoh 10 tylli ki Constituency kiba hap ha East Jaiñtia Hills District.
Kane ka la paw ha ka public hearing ne ka jingpynsngew paidbah kaba khatduh ba la khot pynlong da ka Delimitation Committee jong ka JHADC ha ka 11 tarik Naitung ha Community Hall Khliehriat West, East Jaiñtia Hills District.
Ki 10 tylli ki Constituency ki kynthup ïa ka Muthlong-Sohkymphor, Tuber, Musniang-Rangad, Rymbai-Khliehriat, Sutnga-Narwan, Sutnga-Nongkhlieh, Sumer, Saipung-Nongkhlieh, Narpuh bad Bataw-Lakadong.
U Arborhima Darnei, MDC Saipung u la ong, ka Saipung Constituency kaba la shong la sah da ki jaidbynriew Biate ka dei kaba kyrpang namar ka ïapher na kiwei ki constituency hapoh ka Jylla bad ka ïapher bak-ly-bak naduh ka riti dustur, ka kolshor, ka rukom shongkha- shongman nalor kiwei kiwei ki rukom im.
Shuh shuh u la ong ba naduh u snem 1967, u Lat u la ailad ïa ki nong Saipung ban don noh la u jong u nongmihkhmat hapoh ka District Council khnang ban ïada ïa ka riti dustur jong ki jaidbynriew Biate.
Ka jingpynrung ïa ki shnong Pnar hapoh ka Saipung Constituency da ka Delimitation Committee suki-suki ka jaidbynriew Biate kan sa duh sa dam nalor ba ka la dei lypa ka jaidbynriew kaba ritpaid, la ong utei u nongmihkhmat na Saipung.
U ngeit skhem ba ki shnong Pnar kiba shah pynrung hapoh ka Constituency Saipung wat ma ki ruh kin ym hun ban don hapoh ka Saipung Constituency bad u la kyntu ïa ka Delimitation Committee ban pynneh ïa ka Saipung Constituency kumba ka ju long mynshwa.
U Bah Justine Dkhar MLA barim Khliehriat u la pynpaw ka jingsngew phylla ba ïa ka Dkhiah East la pynkynriah sha Sutnga-Narwan Constituency katba ïa ka Deinchynrum pat la pynhap sha Suntnga-Nongkhlieh kiba dei ki shnong kiba don hajan tam ka District Headquarter, Khliehriat bad u la dawa na ka DC ban pynneh ha Rymbai-Khliehriat ïa ki 5 tylli ki shnong kiba hap hapoh ka Khliehriat Township.
Ki lai shnong kynthup ka Huroi, Lejri bad Lahalein ki la pyrshah ïa ka jingshah pynkynriah sha Bataw-Lakadong bad ki dawa ban pynneh hajuh ha Narpuh namar ka pynsuk ïa ki ha ka leit ka wan.
Ka shnong Chiehruphi ruh ka pyrshah jur ïa ka jingshah pynkynriah na ka Narpuh sha Sutnga-Nongkhlieh kumjuh ka shnong Nongsning, Mynkre ruh ki pyrshah ïa ka jingshah pynkynriah na ka Sutnga-Nongkhlieh.
