Shillong, Naitung 11
Ka khubor kaba la ïohlum na ki pulit lyngba ka ‘website’ jong ki ha ka Sngi Palei ka ïathuh ar ngut ki briew ki la shah rahbor ha ki runar bad kita ki runar ki la rah ïa ka trok jong ki kaba kit sying bad hadien kata, ki la bret ïa kine ar ngut ha Umran Dairy ha Ri-Bhoi.
Katkum ka jingujor jong u Ramen Mridha bad u Rajit Parmanik la ong ba ha ka miet jong ka 9 tarik Naitung, ki runar kiba la don kumba 7 ne 8 ngut bad kiba la shong ha kawei ka trok, ki la pynsangeh ïa ka trok kaba kit sying jong kine ar ngut (WB-73G-8965) ha Ladsharai, Ri Bhoi.
Hadien kata, u Ramen bad u Rajit ki la shah teh ki kti bad shah kah ki dur khmat bad la pynkynriah ïa ki na ka trok sha ka kali Alto. Nalorkata, kitei ki runar ki la kit ïa ki shaduh sha Umran Dairy ha shwa ba kin bret ïa ki ha kane ka shnong.
Ha kawei pat ka jingjia, u Samir Sahani u la ujor ba ha ka miet jong ka 8-9 tarik Naitung, ki runar ki la tuh ïa ka thuk-thuk jong u na Kench’s Trace, Laban, Shillong.
Shuh shuh ki pulit ki la pyntip ba u Hilmen Ch Marak u la ujor ba ha ka 9 tarik Naitung, ki runar ki la tuh ïa ka thuk-thuk jong u (AS-18K-2817) na ka ïing sah jong u kaba don ha Dilma Soksan, Mendipathar ha North Garo Hills.
Ha kawei pat ka khubor, la pyntip ba ha ka 10 tarik Naitung, ki pulit ka South West Garo Hills ki la ïoh bat ïa kawei ka ar shaka (ML-08H-9661) kaba la shah tuh bad ki la kem ruh ïa u nongñiah.
