Jowai, Naitung 11
Haduh san tylli ki kali rit ki la shah pynjulor bad phra ngut ki briew ki la mynsaw hadien ba kawei ka trok 12 shaka kaba kit clinker kaba dang wan na ka thaiñ Ladrymbai ka la leit ban rat bad syllad ïa kitei ki kali.
Kane ka la jia ha ka Sngi Palei ha ka por kumba 3 duna eiei jong ka nohphai sngi ha surok bah NH-6 hakhmat ka khyrdop Jowai Civil Hospital, Ïalong, West Jaiñtia Hills District.
Ïa kane ka trok kaba don ïa u nombor AS01-NC-3867 la ñiah da u Sanju Dkhar na ka shnong Wapungshnong, East Jaiñtia Hills District. Napdeng kine san tylli ki kali kiba la shah rat, lai tylli ki dei kali shimet bad ar tylli ki dei kali kamai.
Ha kane ka jingjia 8 ngut ki briew ki la mynsaw bad la pynkit noh sha Jowai Civil Hospital.
Katba ka Kong Onglangki Lyngdoh ka la kham mynsaw jur namar ka kali ba ka shong kaba don ïa u nombor ML05-N-2244 ka la sied sha synrang na kane ka jingsyllad ha ka trok.
Nalor katei ka kali, kiwei pat ki kali kiba julor ki dei kiba don ïa u nombor ML04-C-5811, ML04-D-7503, ML04-D-2753 bad ML04-D-3728.
Ha kaba ïadei bad kane ka jingjia, ki pulit ka District ki la wan mar-mar ban ai jingïarap ïa kiba mynsaw bad ban tan ïa kine ki kali kiba la julor.
Ki nongñiah kali kamai ki la kynnoh ba utei u nongñiah jong ka trok u dei uba la buaid bad pynher sted ruh ïa ka kali.
Namar kata, ki la kyntu ïa ka sorkar bad NHAI ban buh Speed Breaker haba hiar bad haba kiew shwa ban poi ha Jowai Civil Hospital, Ïalong khnang ban lait na kano-kano ka jingjia ïa ki briew kiba wan ban shah sumar ha kane ka hospital.
