Shillong, Naitung 11
Ki lai tylli ki Regional Committee kiba la thaw ha kaba ïadei bad ka mat pynbeit pud hapdeng ka Meghalaya bad Assam ki la ïoh por ban phah kaiphod sha ka Sorkar Jylla haduh ka 30 tarik Nailur mynta u snem.
Katkum ka jingpynbna kaba la pynmih da ka Sorkar Jylla lyngba ka tnat Home (Political) ha ka 10 tarik mynta u bnai, la ong ba la pynjlan shaduh 30 tarik Nailur, 2024 na ka bynta ki Regional Committee baroh lai tylli ba kin phah kaiphod sha ka Sorkar Jylla.
Ki lai tylli ki Regional Committee ki dei kiba la khlieh da ki Myntri Sorkar kaba kynthup ïa ka Regional Committee na ka bynta ka Langpih bad kiwei ki jaka ha West Khasi Hills district la khlieh da u Myntri Sorkar u Bah Paul Lyngdoh, ka Regional Committee na bynta ka Psiar-Khanduli bad kiwei ki jaka ha West Jaiñtia Hills district kaba khlieh da u Symbud Myntri Rangbah u Bah Sniawbhalang Dhar, bad ka Regional Committee na ka bynta ki jaka ha Ri Bhoi la khlieh da u Symbud Myntri Rangbah u Bah Prestone Tynsong.
Ka Sorkar Meghalaya bad Assam ki la thaw la ki jong ki Regional Committee ban pynkhreh ïa ki jingdonkam na bynta ban pynbeit ïa u pud u sam ha ki 6 tylli ki jaka kiba dang sahteng ha kaba kine ki Regional Committee ki hap ruh ban leit hashen ban peit ïa ki jaka bad sngap ruh ïa ka sur jong ki nongshong shnong.
Kine ki Regional Committee ki la ju ïakynduh teng bad ki Regional Committee ka Sorkar Assam bad ki dang don ki bynta kiba dang sahteng khamtam ban leit ha shen ban peit ban khmih ïa ki jaka kiba don hapdeng ka jingïakajia.
Ki hynriew tylli ki jaka kiba dei ban pynbeit pud ki long ka Langpih, Borduar, Nongwah-Mawtamur, Deshdoomreah, Psiar-Khanduli, bad Block-I & Block-II.
