Nongpoh, Naitung 11
Ki pulit ka Ri-Bhoi ha ka Sngi Palei ki la ïoh ban kem ïa uwei u briew uba donkti ban pynbit-pynbiang ïa ki dkhot ka seng kieng atiar jong ka Hynñiewtrep National Liberation Council (HNLC) ban hiar sha Bangladesh.
Ha ka kyrwoh khubor ba la pyllait da u Superintendent of Police ka Ri Bhoi, u Jagpal Singh Dhanoa u la pyntip ba une u briew uba la shah kem noh ha ki pulit ka Ri Bhoi u dei ba la tip kyrteng kum u Bah Sanborlang Rapsang (38 snem) na ka shnong Mawlai Umjajew, East Khasi Hills District.
Kum ban shu kdew hangne, u Bah Sanborlang Rapsang, u dei u nongïalam jong ka Hynñiewtrep National Youth Front (HNYF) uba bat kum u President ka Mawlai Circle bad Assistant Disciplinary Secretary ka Sengkmie. Ka jingshah kem ka jong u ka dei halor ka jingdonkti ban pynbit-pynbiang ïa ka leit ka wan jong ki dkhot ka HNLC kiba leit ban shah hikai sha ka ri Bangladesh.
Ka kyrwoh na u SP ka Ri Bhoi ka la pyntip ba hadien ka jingïoh kem ïa ki saw ngut ki dkhot ka HNLC kiba la tip kyrteng kum u Bah Cyfrank Paul Pariat, u Bah Kitbok Mujai, u Bah Barnabas Lyngdoh bad u Bah Wanpynshngaiñ Dympep bad ha ka jingtohkit, u Bah Cyfrank Paul Pariat u la phla ba u la leit shah hikai pyntbit sha ka ri Bangladesh kumba shi bnai lynter lem bad uwei pat u rangbah ba la tip kyrteng kum u Kynsaijun Thabah (32 snem) ba ju khot sin kum u Bah Kynsai na ka shnong Umlyngka, Kynton Block-II jong ka East Khasi Hills District.
La ïathuh ruh ba ha ka 5 tarik mynta u bnai Naitung, ki pulit ki la ïoh ban kem ïa u Bah Kynsaijun Thabah bad ha ka jingtohkit, u la phla ba u dei u dkhot jong ka HNLC bad u la leit ban shah hikai pyntbit ruh sha ka ri Bangladesh lem bad u Bah Cyfrank Paul Pariat mynshem snem. U Bah Kynsaijun Thabah u la phla ruh ha ki pulit ba u Bah Sanborlang Rapsang, u dei uba donkti ban ïarap ban pynbit-pynbiang ha ka leit ka wan ka jong u sha ka ri Bangladesh hapdeng u Naitung bad Nailar jong u snem 2023.
Hadien ba la wanrah ïa u Bah Sanborlang Rapsang sha thanat Nongpoh ha ka janmiet Sngi Palei, ki nongïalam ka Hynñiewtrep National Youth Front (HNYF) East Khasi Hills kiba la wan ban synran lang ïa utei u dkhot ba la shah kem. Haba kren sha ki lad pathai khubor ki la pynpaw ïa ka jingsngewsih bad sngewdiaw halor ka jingshah kem ba kyndit jong u dkhot ka seng, u Bah Sanborlang Rapsang.
U Bah Steve Khyriem, President bad Bah T Swer, Assistant General Secretary ka HNYF East Khasi Hills District ki la ong ba kane ka jingpyntyrha ki pulit ïa ki dkhot ka seng kam dei shuh ka sien kaba nyngkong, hynrei kaba la jia uwei hadien uwei da kaba kynnoh ba ki pulit ki la peitngor tang ïa ki dkhot jong ka seng.
Ki la kynnoh ruh ba ki pulit ki la shu pynkubur jubor ïa ki dkhot ka seng ba ki dei kiba ïadon bynta bad ka HNLC da kaba bynrap kumba u President ka seng, u dei u ksiang ha kaba ïadei bad ka jingïakren ïasuk ka HNLC bad ka sorkar jylla, kam mut pat ba ki dkhot ka seng ki ïadon jingïadei bad katei ka seng kieng atiar kaba la shah kheiñ beaiñ.
Kitei ki nongïalam ka seng ki la ong ruh kumba long haduh mynta, ka seng ka dang ïaid ha ka lynti kaba dei bad burom ruh ïa ka aiñ bad ai ruh ïa ka khubor kaba shai sha ki pulit, ka sorkar bad sha u Bah Prestone Tynsong uba dei khmih ïa ka tnat Kam Pohïing ka jylla ba kin sngewbha ban nym pyntyrha than ïa ka HNYF ïoh ynda poi ka por ïoh kim lah shuh ban teh lakam.
Na ka liang ka hynmen jong u Bah Sanborlang Rapsang, ka Kong P Rapsang ka la ïathuh ba ka dap da ka jingsngewlyngngoh kaba khraw haba ka la ïoh jingtip ba ki pulit ki la wan ban kem noh ïa u para jong ka, u Bah Sanborlang Rapsang ha ka Sngi Palei ha ka por kumba 2:30-3:00 baje eiei namar ba u dei u briew uba kitkhia bha ïa ka ïing ka sem, ïa ki khun ki kti bad ïa ka imlang ka sahlang bad uba kloi ruh ban ïarap ïa kino-kino ki briew kiba donkam jingïarap.
