Shillong, Naitung 11
Ki pulit ka East Jaiñtia Hills ha ka Sngi Palei ki la pyntip ba ki la ïoh ban kem ïa uwei u briew ba la suba donkti ha kaba ïadei bad ka jingshah pynïap jong saw ngut ha kine ki khyndiat sngi ba la dep, bad ïa ki metïap jong ki la lap na ka shnong Umpleng.
Lah ban pynkynmaw ba ha ka 6 tarik Naitung, ki ‘riew paidbah ki la lap ïa saw ngut ki briew kiba la shah pynïap dusmon da kaba shah teh lang hajuh ïa ki kti bad shah mait da ki kynja wait na khlieh bad ryndang. Ïa kine ki metïap la lap ha ka jaka kaba don sha lyndet ka ïew Umpleng.
Napdeng kine saw ngut la ïoh ban ithuh kyrteng ïa lai ngut kiba la tip kyrteng kum u Ravi Rai, 23 snem ka rta, uba dei na ka shnong Elam ha Mechipradesh, Nepal, u Rajesh Rai, 26 snem ka rta, na ka shnong Dharan Sunsari kaba ha Koshi Anchal, Nepal bad uwei pat u Nazar Kyndait, 33 snem rta, uba dei na ka shnong Dkhiah, East Pohshnong, East Jaiñtia Hills. Hynrei ym pat lah ban tip ïa ka kyrteng ne jaka sah jong uwei pat uba la shah pynïap lang.
U SP ka East Jaiñtia Hills u la ïathuh ba ïa ka kyrteng jong utei uba la shah kem la buhrieh shwa khnang ba kan ym don kano-kano ka jingthut ha ka jingtohkit. U la ong ruh ba ka jingtohkit ka dang ïaid ban ïoh kem sa ïa kiwei pat kiba la donkti ha katei ka kam bymman.
