Shillong, Naitung 11
Katba ki briew ha ka jylla ki dang ïohthiah lyngngai, kyndit-kynsan ha ka shiteng synñia jong ka 11 tarik u Naitung 2024 ha ka por kumba 1 baje bad 1 baje shiteng eiei, ki pulit ka jylla ki la leit ban kem ïa u samla Eric A. Nongkynrih uba dei u President ka Khasi Student’s Union (KSU) Nongthymmai Circle na ka ïingsah jong u.
Hadien ba la kem ïa utei u samla na ka liang ki pulit ki la rah noh sha thanat Sadar. Mar kumta na ka liang ki nongïalam ka sengkmie kiba kynthup naduh u President rangbah ka seng, u Bah Lambokstar Marngar, u General Secretary, u Bah Donald V. Thabah lem bad ki dkhot ka seng, ki la leit sha katei ka thanat ban pyrta shla bad dawa dei ban pyllait mardor ïa utei u samla.
Hadien katto-katne por eiei, na ka liang ki pulit ka thanat ki la pyllait noh ïa u samla Eric A. Nongkynrih ha katei hi ka shiteng synñia.
Halor ka jingshah kem utei u samla ha katei ka shiteng synñia, ym shym la tip satia ïa kino-kino ki daw tynrai kaba la pynlong ïa ki pulit ba kin leit kem ïa utei u samla. Hynrei na ka liang ka seng kum ka jingdawa ban pyntreikam noh ïa ka Inner Line Permit (ILP) hapoh ka jylla bad ka jingdawa ban pyntreikam noh ïa ka Meghalaya Residents Security and Safety Act, 2016, ka la pynlong ka jingkhynra Work Permit na ka bynta ki nongbylla kiba dei ki barjylla hapoh ka jylla ha ki sngi kiba la dep.
Ha shwa ba ka seng kan pynlong ïa ka jingkhynra Work Permit ïa ki nongbylla barjylla, ka seng ha ka 6 tarik u Naitung 2024 ka la buh ïa ka khyrdop talasi ha Pahammawleiñ ban talasi ïa kiba wan rung shapoh ka jylla hynrei ïa katei ka khyrdop talasi, la kynnoh ba ki pulit ka Ribhoi District ki la pynpra bad thang noh shisyndon ïa katei ka khyrdop na katei ka jaka.
“Ka jingwan kem shiteng miet kam dei ka kam babha; hato phi mut ngi dei ki kaikhlaw?”
Pynrem jur ka KSU Nongthymmai Circle ïa ka jingleh ‘riewkhlaw ka tnad pulit
Shillong, Naitung 11
Ka jingleit kem kynsan ki pulit ïa u President ka Khasi Student’s Union (KSU) Nongthymmai Circle, u samla Eric A. Nongkynrih ha ka step synñia jong ka 11 tarik u bnai Naitung 2024 ha ka por kumba 1 baje haduh 1 baje shiteng eiei na ka ïingsah jong u bad rah ïa u sha thanat Sadar, ka la pynlong ïa ka KSU Nongthymmai Circle ban dap da ka jingbitar bad ban pynrem jur ïa kane ka jingleh bym tip aiñ jong ka tnat pulit ban leit kem ïa u nongïalam ka seng ha ka por jong ka step-synñia.
Haba kren sha ki lad pathai khubor ha ka por mynsngi jong ka 11 tarik u bnai Naitung 2024, u samla Richard Mawkhiew u ba dei u Vice-President, u la ong ba ka jingkem ki pulit ka lah ban dei lehse na ka daw ka jingkhynra Work Permit ka seng ha ki thaiñ Nongthymmai ha ki sngi kiba la dep.
“Na ka liang jong ngi, ngi dap da ka jinglyngngoh bad ngim sngew lah ban mutdur ba kata ka tnat pulit kaba bat bad tip ïa ka aiñ, tang ban shu khot hajir haduh shiteng synñia ka la leit kem ïa u nongïalam jong ngi bad kane ka long kaei-kaei kaba ngim lah ban pdiang”, la ong u samla Richard.
U samla Richard u la ong ba lada ka tnat pulit ka sngew donkam ban khot hajir na utei u nongïalam ne na uno-uno u dkhot ka seng, ka dei ban leh ïa kata ha ka por mynsngi-mynshai hynrei ka jingleh ‘riewkhlaw ki pulit ban leit khynra kynsan ha ka por shiteng synñia napoh ka ïingsah ka long kaei-kaei kaba ym lah satia ban pdiang.
“Na ka liang ka Circle, ngi pynrem bad ngi dawa ruh na ka sorkar khamtam na ka bor pulit ba kam dei shuh ba nangne shakhmat ban leit kem ïa ki dkhot jong ngi ha ka por mynmiet-mynïong hynrei lada phi donkam eiei, phi dei ban wan ha ka por mynsngi-mynshai”, ong u samla Richard.
U la ong ba ka jingwan kem jong ki pulit ha ka por shiteng miet ïa ki dkhot ka seng, ka long kum ka jingkynnoh ba ki dkhot ka seng ki dei ki kaikhlaw bad u la ong ba ki dkhot ka seng kim dei ki kaikhlaw hynrei ki dei ki sengbhalang kiba peit pyrman ïa ka bha ka miat bad ban ïada ïa ka bha ka miat jong ka jylla bad ka Jaitbynriew hi baroh kawei.
Shuh shuh u la ong ba ka seng ka sngewthuh ba ka jingdawa ban pyntreikam ïa ka Inner Line Permit(ILP) ka shong ha ki kti jong ka sorkar pdeng hynrei ka jingdawa ban pyntreikam noh ïa ka Meghalaya Residents Safety and Security Act, 2016 pat ka shong ha ki kti jong ka sorkar jylla da kaba ban jur ba ka sorkar jylla ka dei ban pyntreikam noh mardor ïa kine ki aiñ jingïada khnang ba ki briew kiba wan nabar ka jylla kin nym ïohrung laitlan satia shapoh ka jylla.
U la ong ba ka jingleh ki pulit ka long kum ban pyntieng pynsmiej ïa ki dkhot jong ka seng bad ïa ki bahaïing hasem bad u la ong ba ka seng ka long kaba kloi ban ïatreilang bad ki pulit, hynrei da kaba shu wan kem shiteng miet ïa ki dkhot ka seng, ka pynsat sia bad pynbitar ïa ka seng .
“Ngi sngewthuh shai ba ïa ka mynsiem ieid Ri bad ka mynsiem ban trei na ka bynta ka Jaitbynriew, phin nym lah ban shim ne ban knieh noh na uwei-pa-uwei u dkhot jong ka Jaitbynriew”, ong u samla Richard.
U la ong ba lada ka tnat pulit ka ïai leh ïa kane kajuh ka kam ban wan kem ïa ki dkhot ka seng ha ka por shiteng synñia, na ka liang ka seng kan hap ban pyrkhat da kumwei pat.
“Lada ka sorkar ka ong ïa ngi ba ngim lah ban talasi, balei phim pynbun ïa ki Labour Inspector? Balei kata ka tnad Labour kam leit ha manla ki jaka pyntrei ban leit peit bad leit jngoh ïa ka jingdon jong ki nongtrei barjyll?”, la buh jingkylli u samla Richard.
Shuh shuh u la ong ba kaba sngewlyngngoh ka long ruh ba ka tnat pulit haba ka khot hajir ïa kino-kino ki dkhot jong kiwei-kiwei ki snegbhalang, ka ju khot ïa ki ha ka por mynsngi-mynshai katba ïa dkhot jong ka KSU pat, ka ju ïaleh ban wan kem shiteng miet bad kane ka jingleh ki bor pulit ka long kum ban ai ding shuh-shuh ïa ki dkhot jong ka seng.
