Mawkyrwat, Naitung:
Ka Synjuk San Shnong Manad Area jong san tylli ki shnong kata ka Manad, Mawbidong, Pyndenlyngdoh, Pynden Sohlang bad Lummawbah naduh ki paidbah bad ki nongñiah kali namar ka jingsngewkhia halor ka jingsniew palat ka surok kaba la wanrah jingeh ïa ka leit ka wan u paidbah bad jingsahkut kali kaba man ka por khamtam eh ha ka por lyuir, ha ka 8 tarik u Naitung 2024, ka la lum ïa ki paidbah jong kane ka dong ka thaiñ bad mih shakhmat ban maramot ïa katei ka surok khyndew kaba la sniew palat na ka daw ka jingpynjot jong u slap kaba don kumba 5 km eiei.
U Chairman ka Synjuk San Shnong Manad Area u Bah Redy Shylla haba kren sha ki lad pathai khubor u la dawa jur ïa ka sorkar kumjuh ruh ïa u MLA ka thaiñ ba un tuklar lem ban siang rong ïa ka surok Photjaud Mawbidong kaba don kumba 5 km eiei kaba ki paidbah katei ka dong ka thaiñ ki la angnud baroh shi katta.
Kum ban shu kdew, ka jingdawa jong ka synjuk ban siang rong noh ïa kane ka surok ka dei ka mat kaba la slem bha ba ki paidbah jong kitei ki san tylli ki shnong ki ju dawa na ka por sha ka por na ka sorkar.
Ha kawei pat ka liang, ka Synjuk Manad San Shnong Area ka la dawa ruh na ka sorkar ba ka dei ban plie noh kloi ïa ka Manad Sub-Centre kaba la dep ban tei mynta la kumba hynñiew bnai eiei bad kaba la biang lut nadong shadong.
U Bah Shylla u la ïathuh ruh tang namar ka jingsniew palat ka surok, don ki nongpang bad ki longkmie armet ki khlad noh shiteng lynti shwa ba kin poi ha Mawkyrwat bad lada ka sorkar kan plie noh ïa katei Sub-Centre kan long ka jingmyntoi bad ka jingkyrkhu kaba khraw ïa ki paidbah katei ka dong ka thaiñ ha kaba kim donkam shuh ban leit shaduh Mawkyrwat hynrei tang ha ki khep kiba ki nongpang ki shitom eh.
