Shillong, Naitung:
U Bah Banteidor Lyngdoh, MLA ka Mawkynrew konstitwensi u la pynpaw ka jingsngew sarong da kaba ong ba ki samla ka thaiñ Mawkynrew ki la kiew bha shakhmat ym tang ka pule-puthi hynrei ha ki kam ïalehkai ha ki bynta jingïalehkai bapher-bapher kat nang mih ki sngi ki por.
Haba kren kum u kongsan ha ka jingïalang pynkup burom ka Church Of God Secondary Secondary School ha Nongjrong ïa ki samla pule kiba la ‘pass’ ïa ka eksamin Secondary School Leaving Certificate (SSLC) mynta u snem 2024, ha ka taïew ba la dep, u Bah Banteidor u la kyntu ïa ki samla pule ban long kiba minot ha ka jingpule khlem da klet ia ka akor ka burom.
Ha kane ka sngi, u MLA u la aiti ïa ka ‘Work Order’ ba `10 lak sha ki bor pynïaid skul na ka bynta ban shna pynbha ïa ka ïingskul na ka skhim SRWP.
“Kumba nga la khlei barabor ba na ka skhim jong nga kum u MLA nga kham theh sha ki jaka pule, kata ban pynbiang pynbit ïa ki, kumta kane ka jingaiti ïa ka ‘Work Order’ ka long ban sdang noh ka jingshna ïa ka ïingskul,” u la ong.
Shuh shuh u MLA u la ong ba ka jingbit jingbiang ki jaka pule ka ai mynsiem ïa ki khynnah ban tista bad minot ha ki jingpule jong ki.
“Lada ki skul kim long kiba paka bunsien ki kmie ki kpa kin salia bad artatien ban phah pule,” u la ong.
Da kaba kdew ba ka shnong Nongjrong ka khring bha ïa ka jingwan ki nongjngoh kai pyrthei na ka jingdon ki jaka jngohkai, u Bah Banteidor u la ong ba donkam ka roi ka par kan wan sha kane ka shnong bad kumta donkam ka jingïatreilang na baroh ki bynta kum ka bor shnong, ki Balang, ki skul bad kiwei pat.
Ha kane ka sngi la ïadonlang da ki bor pynïaid skul, ka shnong, ki nongïalam Balang, ki nonghikai lem ki khynnah skul lem ki kmie ki kpa.
