Shillong, Naitung 12
U Symbud CEM ka KHADC u Bah PN Syiem u la ong ba ha ka taïew ban wan yn ïakynduh noh ka Select Committee na ka bynta ban khmih biang ïa ka jingpynbeit konstitwensi bad yn pynsted katba lah ïa kane khnang ba yn lah ban wanrah sha Ïingdorbar lyngba ka dorbar kaba kyrpang.
U Bah PN Syiem u la ïathuh ïa kane haba jubab ïa ka jingkylli u Bah Titosstarwell Chyne ha Ïingdorbar ha ka Sngi Thohdieng hadien ba ka KHADC ka la phah sha ka Select Committee ïa ka jingthmu ban pynbeit konstitwensi.
U Bah Titos uba dei ruh u nongïalam ka Liang Pyrshah bad MDC ka Sohra, u la ong ba namar ka jingpynjlan ïa ka samoi treikam ka KHADC ka la don ka jingkynnoh da kumwei pat ba ka jingpynjlan ka dei namarba ki MDC ki kwah tulop bad ki jingkynthoh ki long kat shaba lap bad ym lah ban pdiang khamtam ha YouTube.
“Ngi kwah ban pynlong noh ïa ka ilekshon District Council hynrei ka jingpynbeit ïa ki konstitwensi ka dei na ka bynta ka jingmyntoi ki paidbah,” u la ong.
U Bah PN Syiem u la ong ba yn pynsted katba lah ïa kane ka kam bad ka jingpynlong ïa ka ilekshon kam shong ha ki kti jong ngi hynrei ha ka Sorkar bad u Lat. Kumta u la ong ba ka jingphah sha ka Select Committee ka long kaba shai bha khamtam haba don kano-kano ka jingtyrwa ban beit biang ïa ka rukom pynbeit ïa ki jaka ha ki konstitwensi bapher bapher.
U MDC ka Nongpoh u Bah Balajied Rani ruh u la kwah ban tip lano ka kam kan ïaid noh lyngba ka Select Committee namarba ka jingpynjlan ïa ka samoi treikam ka dei hi na ka bynta ka jingbhalang.
U Bah PN Syiem u la ong ba yn pyrshang ban khot ïa ka jingïalang jong ka Select Committee ha ka taïew ban wan, bad ïa mynta, dang ap ban pynmih ïa ka jingpyntip na ka ophis u Chairman ka KHADC khnang ban lah ban khot noh ïa ka Select Committee.
