Shillong, Naitung 12
Ka Voice of the People Party (VPP) ka la pynrem jur halor ka jingbyrngem-jingbyrsit jong uwei u briew ïa ki nongtrei ka District Transport Office (DTO) ha ka 6 tarik mynta u bnai.
“Ka jingjia myn ha ka 6 tarik Naitung, 2024, ha kaba uwei u briew u la kren beiñ bad byrngem ïa ki nongtrei jong ka DTO ha Laitumkhrah katba ki dang pyndep ïa la ka kamram ka la long kaba ijli bad kaba dei ban pynrem jur,” la ong u nongaiktien ka seng, Dr. Batskhem Myrboh ha ka kyrwoh khubor.
U Dr. Myrboh u la ong ba utei u briew ym tang ba u la ñiewbeiñ ïa ki nongtrei katei ka ophis hynrei u la byrngem ruh ïa ki da ka jingbishar jong u paidbah ha ka jingpyrta “Ha U Prah”.
“Kane ka dei ka kam kaba sngewsih kaba ki bor synshar ki dei ban shim ïa ki sienjam kiba tyngeh pyrshah ïa u. Na ka liang ka seng ngi pynrem jur ïa ka jingleh bad jingkren jong utei u briew,” u la ong.
U la ong ruh ba halor ka jingtohkit jong ka seng, la lap ba utei u briew u dei u dkhot bad nongtrei jong kawei ka seng saiñ pyrthei.
“Ka VPP kam ju pynshlur ïano-ïano ruh, kynthup ïa ki dkhot bad ki nongkyrshan jong ka, ban leh sarong, ban pynthut briew ne ban pynmih ki kam huri-hura. Ka jingleh jong utei u briew ha katei ka jingjia ka la long da ka jingthmu ban pynsniewdur bad pynthohbria ïa ka VPP. Kumta, ka seng ka pynrem jur ïa kane ka jingleh jong u,” la ong u nongaiktien.
Shuh shuh u la bynrap ba ka seng ka dawa ba utei u briew u dei ban panmap paidbah na ka VPP bad ïa kata ka jingpanmap dei ban pynmih ruh sha ki lad pathai khubor.
“U dei ban pyndep ïa kane hapoh lai sngi naduh ka sngi ba la pynmih ïa kane ka jingpynbna ha ki lad pathai khubor. Lada um lah ban kohnguh ïa kane ka jingdawa jong ngi, ka Seng kam banse ban shim da kiwei pat ki sienjam kiba kham tyngeh,” la ong u Dr. Myrboh.
Na ka liang ka Seng ka kyntu ïa ki bor Sorkar ban kiar na kino-kino ki kam kiba lah ban pynmih ïa ki jingkulmar bad pynjynjar ïa ki paidbah haba ki pyndep ïa ki kamram jong ki.
Ha kajuh ka por, ki paidbah ki dei ban burom ïa ki namarba ki pyndep ïa la ka kamram na ka bynta ka bha ka miat jong kyllum lang baroh, u la ong.
