Phulbari, Naitung 12
U MP bathymmai ka Tura, u Saleng A. Sangma ha ka Sngi Thoh-dieng u la leit jngoh ïa ki jaka thor kiba la shah ktah namar ka jingshlei um ha ryngkat ka jingdonlang ki MLA barim, S.G. Esmatur Mominin, Brigady Marak bad Ferlin C.A. Sangma lem bad ki tnad treikam bapher-bapher ban khmih bniah ïa ka jinglong-jingman kumjuh ban sngap ïa ki jingpynsngew na ki nongshong shnong halor kane ka bynta.
U Sangma ha kane ka jingleit jngoh jong u, u la ther tyngeh ïa ka Sorkar hapoh ka jingïalam ka NPP da kaba kynnoh ba kam shym la kitkhia ïa ki nongshong shnong jong ki jaka thor wat la ka thaiñ ka ïakynduh jingeh man u snem.
“Ka jingshlei um ka jia man u snem bad man u snem ngi ïohi ïa ka jingwan ki Myntri kumjuh u Myntri Rangbah. La pynbiang T.8000 klur sha ki Jylla bapher-bapher hynrei sha ngi, ym shym la ai eiei. Ngim don kano-kano ka jingtyrwa man la u snem. Kaei kin ai sha ki nongshong shnong jong ki jaka thor, 2 kilo u khaw? Balei kam don wat tang kawei ruh ka jingtyrwa? Naba phi la jied ïa ngi (Congress) ngi peit kaei kaba ngi lah ban leh. Kane kan dei ka sienjam banyngkong kaba ngin shim. I kumba da kane ka jingleh ka Sorkar ba ym don jingshlei um hapoh ka Jylla wat la ha ka jingshisha ka long mar khongpong. Ngin sa phah ïa ka kyrwoh sha ka Sorkar Pdeng ba ngi mad ïa kane man u snem,” la ong u Saleng sha ki nongshong shnong ha ka jingleit jngoh jong u.
Haba kren hadien ka jingleit jngoh jong u ïa ki paid nongshong shnong na ki jaka thor, u Saleng u la kular ba un trei lang bad ki tnad treikam bapher-bapher ka Sorkar Pdeng ban pynduna ïa ka jingeh jong ki paidbah.
“La pyntip sha nga da u Mominin (MLA barim ka Phulbari) halor ka jinglong-jingman ka jingshlei um bad kyrpad phah wan jngoh ïa nga. Naba nga dang bunkam ha katei ka por, ngam shym la ïoh wan, hynrei nga la pyntikna ban wan hangne ban peit hi da lade. Hashuwa ba ngan wan hangne, nga la leit mih sha ki tnad treikam ha Delhi ban sngewthuh haei ka Meghalaya ka don haba phai sha ki lad ban tehlakam ïa ka jingshlei um, hynrei nga la kyndit ba ym don jingtyrwa na ka liang ka Jylla ban tehlakam ïa ka jingshlei um ha u snem ba la dep bad hashuwa kumjuh,” la ong u Saleng.
U Saleng u la ïathuh ba ha u snem ba la dep, palat T.8000 klur la pynbiang da ka Sorkar Pdeng sha ki Jylla bapher-bapher kynthup ïa ka Assam (T.100 klur), Arunachal T.23 klur) nalor kiwei.
“Ym shym la ai eiei sha ngi na bynta ban khmih bniah ïa ka jingshlei um bad lada phai biang sha ka bynta ba ym shym la don jingtyrwa ba la phah da ka Jylla, i kumba ym shym la don jingshlei um hapoh Jylla jong ngi. Kane ka ïapher bak-ly-bak ban ïa kaei kaba la ïohi man u snem da ki nongshong shnong ki jaka thor,” u la ong.
U Saleng u la kular ïa kito kiba la wan ïakynduh ïa u ba un wad ka lad ka lynti – ka ban kynthup ruh ïa ka Sokrar Jylla ban wad ka lad ban pynbeit shi syndon ïa kane.
“Ngim lah ban pynsangeh ïa ka jingshlei um, hynrei ngi lah pat ban khmih bniah ïa ka jinglong-jingman lyngba ki lad ki lynti. Nga la wan ïalam lang ïa ki tnad treikam bapher-bapher ha kane ka jingwan jngoh ban khmih la ngi lah ne em ban wad ki lad ki lynti ban pynduna ïa ka jingeh kaba phi ïakynduh man u snem,” u la ong.
Na ka liang ki nongshong shnong ka Chibinang ki la aiti ruh ïa ka shithi sha u MP halor ka jingtuid khyndew kaba dang bteng na ki rud ka Wah Rongai namar ka jingker nar kaba la pynïeng hapdeng ka wah kumjuh ka baden (dam) kaba sahteng mynta la bun-bun snem.
