Shillong, Nailur 11
Ki don haduh 2,604 ngut ki nongpang TB kiba dang shah sumar mynta ha ka Jylla, ha kaba 89 ngut ki ‘Ni-kshay Mitra’ ki kyrshan ïa 328 ngut na kine.
U Lat ka Jylla, u C.H. Vijayashankar ha ka Sngi Thohdieng u la sam ruh ïa ki kriah bam sha ki 10 ngut ki nongpang TB ha Lok Bhavan hapoh ka ‘Pradhan Mantri TB Mukt Bharat Abhiyaan’, da kaba pynsngew ruh halor ka jingkitkhia bad ka jingai mynsiem ïa kito kiba don hapdeng ka jingsumar.
Ha kane ka sngi, la don lang ruh u Additional Chief Secretary sha u Lat ka Jylla, u H.C. Chaudhary bad Chairman bad Managing Director ka NEDFi, u PVSLN Murty.
Ka kyrwoh ka la ong ba ka jingïashim bynta jong ki paidbah ka ïai long ka bynta kaba kongsan ban rat dyngkhong ïa ka jingpang TB.
“Naduh ba la sdang ïa ka ‘Ni-kshay Mitra’ ha u snem 2022, ki don 452 ngut ki ‘Ni-kshay Mitra’ kiba la wan shakhmat ha ka Jylla, ha kaba la sam ïa 12,897 tylli ki kriah bam kiba ai jingmyntoi ïa ki 3,918 ngut ki briew kiba don ïa ka jingpang TB,” la ong ka khubor.
Ka NEDFi kum ka ‘Ni-kshay Mitra’ ka la kner ïa ka jingkyrshan kaba ïaineh.
U Murty u la ong ba ka NEDFi ka la trei palat 30 snem haba ïadei bad ki jingthmu pynroi kynthup ïa ka jingai kam ai jam ïa ki kynthei bad ka koit ka khiah, bad ka dang plie ïa ki jingthmu na ka bynta ka bha ka miat.
U la ïaroh ïa ki jingpyrshang jong ka Sorkar India bad ka Sorkar Meghalaya ha ka ban pynbiang ïa ki lad ki lynti bad ka jingsumar sha ki nongpang TB.
Na ka liang u Lat u la ong ba ka jingkyrshan ba ïaineh jong ka imlang-sahlang ka long kaba kongsan ban ïoh ïa ka Meghalaya kaba lait na ka jingpang TB bad ka India kaba lait na ka jingpang TB.
