Shillong, Nailur 11
Ka United Democratic Party (UDP) ka la pan jingpynshai na ki MLA ka Party halor ki khubor jingkynnoh ba ka la don ka jingïakren jong ki ban leit pynïasoh sha ka Bharatiya Janata Party (BJP) ha kaba u General Secrectary ka Party u Bah Titostarwell Chyne u la pynksan ba ki MLA ka Party ki dang long shi tylli bad skhem ha ka Party.
Haba kren sha ki nongthoh khubor u Bah Titos u la ïathuh ba na ka liang ka Party ka la kyrpad ïa baroh ki MLA ba ki dei ban neh haduh kaba kut ha ka Party, u la kubur ba ka jingleit ïakynduh jong ki MLA ïa u Amit Shah uba dei u heh jong ka BJP ka don, kumjuh ka jingtyrwa ïa ki MLA ban rung BJP ka lah ban don, hynrei u la ïathuh ba ki MLA ka party ki pynpaw ba ki dang skhem bad ka Party.
Shuh-shuh haba ïadei ka jingbym poi lut ki MLA ka Party ha katei ka jingïalang u Bah Titos u la pynshai ba ki la don 6 ngut ki MLA kiba la poi ha katei ka jingïalang bad u la ïathuh ba ki don ruh kiba la pyntip sha ka Party ba ki don hapdeng ki jingbunkam ba kim lah ban poi ha ka jingïalang, hynrei ym don da kiwei ki daw.
Haba jubab ïa ki jingkylli haba ïadei ka jingkynduh jingeh ki MLA namar ka jingbym leh eiei u Bah Metbah Lyngdoh uba long u President ka Party, u Bah Titos u la kubur ba ki MLA ki lah ban ïakynduh shibun ki jingeh ha ki Constituency ki jong ki, hynrei u la ïathuh ba ïa kane ki MLA ki la don la ka jong ka Committee ban pynbeit ïa ki jingeh bad ruh ba shen ki sa don biang ïa ka jingïakynduh lang.
