Shillong, Nailur 11
U nongïalam ka Bharatiya Janata Party (BJP) uba long ruh u MLA ka Pynthorum-khrah Constituency Bah A.L Hek ha ka sngi Thohdieng, u la ïakynduh ïa u Myntri kam Pohïing ka Sorkar India, u Amit Shah, ha New Delhi, ban ïakren halor ka jinglong jingman jong ka saiñ-pyrthei ha Meghalaya bad halor ka rukom treikam jong ka Party ha ki sngi ban wan.
U Bah Hek u la pynpaw ba u la ïoh ïa ka lad ban ïakynduh ïa u Amit Shah bad ban ïakren sani bha halor ka jinglong jingman ka kam saiñ-pyrthei ha ka Jylla Meghalaya bad ban nang pynkhlaiñ pynbha ïa ka rukom treikam kaba ki paidbah ki lah ban shaniah ïa ka Party ha ka Jylla.
Shuh-shuh u Bah Hek u la pynpaw ruh ba u la ïoh ban pynsngew haba ïadei ka Foreign Contribution (Regulation) Act (FCRA) Bill kaba la pynmih ka jingsngewkhia ïa ki kynhun riewngeit Khristan, ïa kaba u Amit Shah u la pyntip ba u la ïoh ban ïamir jingmut ym duna ïa ka 35 sien bad ki nongïalam niam haba ïadei kane ka mat.
Kumba ka long mynta, ïa kane ka Bill la phah sha ka Joint Parliamentary Committee ban ïakren bniah bad ynda ka Joint Parliamentary Committee (JPC) ka la dep bishar bniah, yn sa khot ïakren bniah ïa kane ha Delhi.
U Bah Hek u la ong, “Nga la pan jingmut na u Amit Shah kumno ban pynkhlaiñ ïa ka Party jong ngi ha kylleng ka Jylla, ban ïoh ïa ka jingshaniah na ki paidbah bad ban trei ha ka ban ïoh thaw ïa la ka jong ka Sorkar.”
