Shillong, Nailur 11
Ka United Democratic Party (UDP) ha ka sngi Thohdieng ka la khot kyrkieh ïa ka Central Executive Committee (CEC) ban ïakren halor ka jinglong jingman ka kan saiñ-hima khamtam haba ïadei ka khubor ba la kynnoh ba ki don ki MLA ka Party ki ban pynïasoh sha ka Bharatiya Janata Party (BJP) bad ka National People’s Party (NPP).
Ha kane ka jingïalang ba la khot pynlong ha ka ophis treikam ka UDP kaba don ha Bomfyle Road, Shillong. Napdeng ki 12 ngut ki MLA ka UDP, u Bah Metbah Lyngdoh, MLA na Mairang uba dei ruh u President ka Party bad uba bat ïa ka kam Myntri ha ka Sorkar MDA-II, nangta u Bah Lahkmen Rymbui, MLA na Amlarem uba dei ruh u Myntri ha ka Sorkar MDA-II, u Bah Balajiedkupar Synrem, MLA na Shella, u Bah Olan Sing Suiñ, MLA na Mawsynram, u Bah Renikton Lyngdoh Tongkhar, MLA na Mawkyrwat bad u Bah Nujorki Sungoh, MLA na Mookaïaw ki dei kiba la donlang ha kane ka jingïalang.
Katba kiwei pat ki MLA kiba khlem poi sha kane ka jingïalang ki kynthup ïa u Bah Paul Lyngdoh, MLA na West Shillong, Bah Mayralborn Syiem, MLA na Nongpoh, u Bah Kyrmen Shylla, MLA na Khliehriat, u Bah Synshar Kupar Roy Lyngdoh Thabah, MLA bad MDC na Sohïong, u Bah Pius Marweiñ, MLA bad MDC na Ranikor bad u Bah Matthew Beyondstar Kurbah, MLA na Mawphlang bad la ong ba ki katto katne ki la pyntip ba kim lah ban poi sha ka jingïalang dei na ka daw ka kam shimet jong ki.
Nalor kine la ïadonlang ruh u Bah Titostarwell Chyne General Secretary ka UDP, uba dei ruh u MDC na Sohra, u Bah Equator Nongrang, MDC na Mairang, u Bah Barikupar Synrem, MDC na Shella, lem kiwei-kiwei ki nongkitkam ba hakhmat jong ka Party ryngkat u Bah VGK Kynta, u kyrtong ba ka Party ka pynkhreh ba un aireng ha ka ilekshon MP shiteng samoi sha Lok Sabha na Shillong Parliamentary Constituency.
La ong ba ha katei ka jingïalang la ïakren halor ki khubor ba ki MLA kin rung sha kiwei ki seng saiñ-hima ha kaba la don na ki MLA kiba pynpaw ba ki la ïakren bad ka BJP da kaba buh hakhmat ban pynurlong ïa ki jingdawa bad lada ka BJP ka lah ban pynurlong. Kumba long ka jingïakren ba ki MLA kin phet noh sha ka BJP ne NPP ka dang long ha suiñ bad kam shai kdar la kin leit ban pynïasoh ne em. Hashuwa jong ka jingïalang CEC, ka Party ka la pynher ehdaw ehrngiew ïa ka lama ka Party, kumjuh ban kynmaw burom ïa ki nongïalam kiba la seng la pynlong ïa ka United Democratic Party mynha ka 11 tarik u Nailur jong u snem 1997.
