Shillong, Nailur 11
Ka Khun Hynñiewtrep National Awakening Movement (KHNAM), ka la kynnoh ba ki nong-trei ba siew bainong sngi ha Secretariat Adminis-trative Department (SAD), kidei kiba la thungkam tang da kaba shu phone khlem ka kyndon, kaba lam sha ka jingthungkam ïa ki briew lajong.
Ka KHNAM ha ka jingujor sha u Myntri ka tnad SAD, ka ong ba katkum ka jubab RTI ka tnad kam shym la don satia ïa ki kyndon ban khot trei ïa ki nongtrei ba siew bainong sngi.
“Ïa ki nongtrei ba siew bainong sngi la khot ban thungkam tang da kaba shu phone bad ka shong ha u Nazir ban rai ïano ban phone bad ïano ban nym phone” kynnoh u Working President ka KHNAM u Bah Thomas Passah.
U Bah Thomas haba kren sha ki lad pathai khubor ha ka sngi Thohdieng jong ka taïew u la ong, ba ki don bun ngut ki nongtrei la siew bainong sngi katkum ka dor ba buh da ka tnad Labour, hynrei hadien ba shimti une u Nazir ba mynta, ki nongtrei kiba la don 10 snem ha ka jingshakri ki la shah weng lut.
“Hadien ba une u Nazir ba mynta u shimti ïa ka kam, ki nongtrei kiba la shakri palat ïa ka 10 snem ki la shah weng bad la bujli da ki briew kiba ïajan bad u Nazir” u la kynnoh.
Ka KHNAM ka kam, ba 10 ngut kum kine ki nongtrei kiba la shakri palat 10 snem, ki la shah pynduh ïa ka RCW hapoh ka scheme 1996.
“Kine ki nongtrei ki la shakri hok la palat 10 snem hynrei naba u Nazir u pyrshah ïa ki, ki la duh ïa ka lad ban kamai na ka bynta ka ïing ka sem” ong u Bah Thomas.
U ïathuh ba ka RTI ka pyni, ba ka jingthungkam ka long kaba shipor na ki kam kiba lait bad la pynkut noh ynda la thungkam pura, hynrei kane ka jingleh pat ka long kaba la leh da kaba shu jied briew.
“Ngi la pan RTI la bun tylli bad ngi la aiti ïa ka jingthoh sha u Chief Secretary bad Secretary ka SAD haba khmih lynti ba kin shim ïa ka sienjam ban pynbeit, hynrei ym shym la leh eiei satia” ong u Bah Thomas.
Haba dawa ban leh eiei, ka KHNAM ka ong “U Nazir ula don bynta ha ki kam leh shiliang bad jied briew lajong, kumta na ka bynta ka jingbha ka synshar khadar, dei ban weng noh mardor ïa u Nazir bad bujli da ki briew kiba trei bha bad ba lah ban trei ïa ka kam”.
Ka KHNAM ka la dawa ban thungkam biang ïa ki 10 ngut ki nongtrei bad ai ïa ka RCW katkum ka Regular Casual Worker Scheme 1996.
