Shillong, Nailur 11
U Myntri Rangbah ka Jylla, u Conrad K. Sangma ha ka Sngi Thohdieng u la plie paidbah ïa ka sienjam ba ïadei bad ka ‘Maternal and Child Care Kit’ hapoh ka ‘Mission 1000 Days’ ha Rongara, South Garo Hills.
Ïa kine ki tiar yn sam sha baroh ki kmie kiba kha khun ha ki jaka sumar paidbah ha ka Jylla – kaba kynthup ïa kumba 70,000 ngut ki kmie bad ki khyllung-khynnah ha ka shisnem.
Ha kawei-kawei ka song, don ka pla na ka bynta ka kmie, ki jaiñ phong jong ki khyllung ba dang kha, ka jaiñkup, ki tiar sumar khyllung bad ka shithi na u Myntri Rangbah ka Jylla halor ka jingdonkam jong ka jingheh-jingsan jong ki khyllung ha ki rta ba shakhmat.
“Ka jingbei tyngka ha ki khyllung-khynnah ha ki snem ba ki dang rit ka dei ka jingbei tyngka ha ka lawei jong ka Meghalaya,” la ong u Conrad.
U la ong ba ka ‘Mission 1000 Days’ ka ting ïa ka rukom treikam jong ka jingim – naduh ka por ba pun haduh lai snem – kaba long kaba kongsan na ka bynta ka jingheh-jingsan ha ka met, ka jingmut-jingpyrkhat, ka jingsngew bad ka jingroi ha ka imlang-sahlang.
“Ka por naduh ba sdang pun khun haduh lai snem ka rta ka long kaba kongsan bha. Ka jingsdang ka pyntikna ba ki kmie bad ki khun ki ïoh ïa ka jingsumar, jingkyrshan bad jingpynsngewthuh kaba donkam ha kane ka por kaba kongsan,” u la ong.
U Conrad u la ong ruh ba kine kiei-kiei baroh kim dei tang ka song ba ïadei bad ki tiar ki tar, hynrei ka dei ka khubor.
“Ka long kum ka lad ban pynskhem ba man la ka kmie ka dei hok ban ïoh ïa ka jingsumar bad man la u khynnah u dei hok ban ïoh ïa ka jingsdang kaba paka tam ha ka jingim. Ka mishon ka thmu ban pynkhlaiñ ïa ka jingsngewthuh bad jingkyrshan ïa ki kmie bad ki longïing da kaba buh hakhmat eh ïa ka jingheh-jingsan jong ki khynnah ban tei ïa ka pateng kaba koit ba khiah bad kaba lah ban leh ïa shibun kiei-kiei,” u la ong.
