Nongstoiñ, Naitung 12
Ha ka Sngi Thohdieng jong ka taïew, ka Khasi Students’ Union, West Khasi Hills District Unit ka la hiar sha Athiabari, West Khasi Hills bad buh syndon da ka khyrdop talasi ILP bad khynra naphang ïa ki bar jylla kiba ïaid lyngba katei ka surok khlem ki kot ki sla kiba biang.
Lah ban kdew hangne ba katei ka jingpyni bor jong ka KSU ka dei ruh shi bynta kum ka jingpynbor ïa ka Sorkar ba kan pyntreikam noh mardor ïa ka Inner Line Permit (ILP) bad ka Meghalaya Residents Safety and Security Act ( MRSSA) 2016.
U President ka KSU WKH, u samla Johnfisher Nongsiang u la ong ba ka jingthmu jong ka seng ban buh ïa katei ka khyrdop ka long ban sdang pynlong ïa ka jingkhynra ïa ki bar jylla ha ki bynta bapher-bapher jong ka dong ka thaiñ ka West Khasi Hills.
U samla Nongsiang u la ong ruh ba kumba la tip ba ka Sorkar Jylla naduh u 2019 ka la mynjur ïa ka rai ban pyntreikam noh ïa ka ILP hynrei haduh mynta, la saw bad san snem, kane ka jingleh jong ka Sorkar Jylla, ka jingsngap mynthi ka pynlong ïa ka KSU ba kan hap ban pynlong ïa ki prokram bapher-bapher.
“Kane ka dei ka jingsdang ka jong ngi bad nangne shakhmat ngin khynra ha man ki jaka bad lada ka Sorkar kan dang ïai sngap mynthi ïa ki jingdawa ka seng, ngin shim da kiwei pat ki sienjam kiba kham tyngeh,” la ong u samla Nongsiang.
Shuh shuh u la ong ba ka KSU ka pynrem jur ïa ka Sorkar Jylla kaba pynngat ïa ki dkhot bad ki nongïalam ka seng haba ki leit ban khynra ïa ki bar jylla kiba don ha ki bynta bapher-bapher jong ka Bri u Hynñiewtrep namar ka jingwan ka jong ki khlem ka jingpynbiang ïa ki kot ki sla hynrei ka jingleh ka jong ki ka pynbitar ïa ki dkhot ka seng lyngba ka jingshah kem.
“Kane ka jingpharep ïa ki dkhot ka seng kan nang ai mynsiem shuh-shuh ïa ngi ban ïada ïa ka ri bad ka jaidbynriew bad nangne shakhmat ngin dang ïaid shakhmat bad ki jingïakhih ban khynra ïa ki bar Jylla,” u la ong.
U samla Nongsiang u la ong ba ka KSU ka kyntu ïa ka tnad pulit ba ka dei ban peitngor bha ïa ka jingwan ki bar Jylla khamtam ki ‘Infiltration Check Gate’, ka tnad labour bad lyngba kane ka jingïakhih, ka Sorkar Jylla kan shimkhia ban pyntreikam ïa ki aiñ ba kumba ki la rai ki dei ban leh ïa kaei ba ki paidbah ki la jied ïa ki kum ki nongmihkhmat ban pyntreikam ïa ki aiñ.
