Shillong, Naitung:
Ka Federation of Khasi Jaiñtia and Garo People (FKJGP) Sengkmie bad Shillong City ha ryngkat ka jingsynran lang jong ki pulit Enforcement ka Khasi Hills Autonomous District Council (KHADC), ki nongtrei ka Shillong Municipal Board (SMB), ka tnad Food Safety bad na ka tnad Labour ha ka 8 tarik u Naitung, ki la leit ban khynra ïa ki dukan bar jylla kiba don ha ki thaiñ Polo bad Demseiñïong khlem ki kot ki sla kiba biang.
Ha katei ka jingleit khynra, ka seng ka la lap bun na ki dukan bar jylla kiba die ïa ki mar ki mata bad ki marbam-mardih ki la shong dukan beaiñ khlem da pynbiang ïa ki kot ki sla kiba donkam ne pynthymmai ïa ki Trading License wat haba ka por ka la kut noh.
La sakhi ruh ba katba ka seng, ki bor pulit bad ki ophisar ki dang ïaid ban khynra ïa ki dukan jong ki bar jylla, katto-katne tylli ki dukan jong ki bar jylla ki la khang pynsted da ki tala namar ba kim don ïa ki kot ki sla kiba biang. Ha kane ka jingleit khynra la lap ruh ba ki dukan bam ki long kiba jaboh bad isaitmet haduh katta-katta ha kaba ki la don katto-katne ki dukan kiba la shah phah khang namar ka jinglehsih shaba palat.
Shuh shuh ka seng ha katei ka jingleit khynra ka la lap ba ki don ki nongbylla bar jylla ki bym don wat ïa ka Labour License na ka tnad Labour.
Kumta ka seng mardor ka la phah phang shisyndon ïa kitei ki dukan bar jylla, bad ong ruh ba kin pynbiang shwa ïa ki kot ki sla ha shwa ba kin lah ban wan plie biang ïa ki dukan.
Ha ka jingïakren bad ki lad pathai khubor, na ka liang u Bah Khrawkupar Nongsiej u ba dei u Chief Organizing Secretary ka seng FKJGP, u la ong ba ha katei ka jingkhynra jong ka seng ka la lap ba ki don shibun tylli ki dukan ki bym shym la pynbiang satia ïa ka Trading License ne ka Labour License bad kum ka eng na ka por sha ka por, kam ju shong thaid ban khynra ïa ki dukan barjylla kiba wan shong kamai ei khlem da pynbiang ïa ki kot ki sla.
“Ngi kyntu ruh ïa ka Municipal ba ka dei ban shimkhia na ka por sha ka por ban khynra ym ba na ka liang ka seng ka hap ban leh ïa kata, lada ka tnad hi ka shimkhia ha ka ban khynra Trading License bad Labour License, na ka liang ka seng ngi ruh ngi kloi ban mih shakhmat ban trei ryngkat bad ki”, la ong u Bah Nongsiej.
U Bah Nongsiej u la ong ba kane ka jingkheiñ sting bad jingleh katba mon jong ki barjylla ban kamai beaiñ khlem da pynbiang ïa ki laisen, ka wanrah ka jingduhnong kaba khraw bha ïa ki tnad bad ka jylla hi baroh kawei.
U la ong ba katkum ka Meghalaya Identification Registration of Migrant Workers Act, 2020 ka la kren shai ba kino-kino ki briew kiba pyntrei da ki barjylla, ka dei ka kamram jong ki ban pynrung kyrteng ïa ki nongbylla jong ki hapoh ka tnad Labour.
Na ka liang ka seng ka la ong ruh ba kan sa leit ba ïakynduh ïa u Chief Executive Officer (CEO) bad ki Licensing Officer jong ka Municipal Board ban pan ïa ki kyrteng jong kitei ki dukan jong ki barjylla kiba la khang pynsted ïa ki dukan jong ki ha shwa ba ka seng kan pynlong ïa ka jingkhynra.
Shuh shuh u la ong ruh ba ka seng kan sa nang ïai buddien ban khynra ïa ki dukan jong ki bar jylla baroh, bad ba lada ki kwah ban kamai ki hap ban pynbiang shwa ki kot ki sla bad lada kim pat pynbiang ia ki kot ki sla kim dei ban wan plie ïa kine ki dukan.
