Shillong, Naitung 12
U MLA ka Nongpoh u Bah Mayralborn Syiem ha ka Sngi Thohdieng u la leit ïakynduh kyrpang ïa u Myntri ka tnat Development of North Eastern Region (DoNER) u Jyotiraditya Scindia ha kaba ïadei bad ka jingpyntikna ban ïoh ïa ka jingmang pisa na ka bynta ka surok na Nongpoh sha Umden ha kaba ka jingtyrwa ka la don mynta bad ka North Eastern Council (NEC).
U Bah Mayralborn u la aiti ruh ïa ka jingthoh ha u Scindia ha ka jingïakynduh kaba la donlang ruh u Myntri Rangbah, u Conrad K Sangma namarba une u Myntri u la wan khnang sha Shillong na ka bynta ban ïakren ïa ki kam pynroi ha ka Thaiñ Shatei Lam Mihngi.
U Bah Mayralborn u la ong ba ka jingleit ïakynduh ban ai lang bad ka jingthoh ka long kum ka jingbuddien ban pynsted ïa ka kam namarba ka Sorkar Jylla lyngba ka tnat Planning ka la dep phah sha ka NEC bad na ka NEC kan leit sa sha ka tnat DoNER ban mynjur ïa ka mang pisa.
U la ong ba ka surok na Nongpoh sha Umden kumba 20km na ka tnat DoNER ha kaba kan dei lyngba ka skhim North East Special Infrastructure Development Scheme (NESIDS) bad na ka liang u Myntri ka tnat DoNER u la kular ban buh hakhmat eh ïa kane ka projek ban ïoh ïa ka jingmynjur kaba la antad ba kan poi kumba T. 52 klur 98 lak.
U la ong ba u hap ban buddien namar ki don ki kyndon kiba hap ïaid lyngba na ka bynta ki projek bapher bapher hashwa ban ïoh ïa ka jingmynjur kumba T.52 klur 98 lak, ym dei ba yn shu ïoh noh mynta mynta.
Une u MLA ka Nongpoh u la ïathuh ba kane ka surok na Nongpoh sha Umden ka dei ruh ban poi sha Sonapur ka don ar bynta ha kaba na Nongpoh sha Umden ka dei lyngba ka skhim NESIDS hapoh ka jingpeit ka tnat DoNER, bad ha ka wat ba-ar na Umden sha Sonapur kumba 39km ka dei lyngba ka skhim PMGSY-III hapoh ka tnat Rural Development ka Sorkar Pdeng.
U Bah Mayralborn u la ai khublei ruh ïa u Myntri Rangbah, u Symbud Myntri Rangbah bad ïa ka Sorkar Jylla kaba la buddien lang ban pynurlong ïa kane ka surok.
U la ong ba kane ka surok ynda la dep ban shna kan long ka jingmyntoi ym duna ïa ka 150 tylli ki shnong hapoh ka thaiñ.
