New Delhi, Naitung 12
U Bah Marvel Sungoh na ka shong Byrwai kaba hap ha East Jaiñtia Hills district u la ïoh ban pyllait im ïa kawei ka samla na Jaiñtia kaba la shah thok ha uwei u briew haba ka la poi sha Delhi.
U Bah Marvel mynta u sah ha Delhi la palat 10 snem naduh u snem 2014. U trei ïa ka kam kaba ai kyrteng My Home India ban ïarap ïa ki briew na ka thaiñ Shatei Lam Mihngi kiba sah ha Delhi.
U la ïathuh ba mar shu pyndep ïa ka jingpule klas XII na Jowai u la wan bylla noh sha Delhi namar u sngew-thuh ba ka jingkyrduh kam ha Meghalaya.
Ïa u Bah Marvel, U Nongsaiñ Hima u la ïakynduh ha ka por ba u wan ban pynkhreh bam ïa ki nonglum khubor kiba wan ïashimbynta ha ka prokram pyni nam ïa u sohtrun ba pynlong da ka Sorkar Meghalaya ha nongbah Delhi naduh 10 tarik haduh 14 tarik Naitung 2024.
Ban tip kham bniah ïa ka jingim jong u Bah Marvel haba u sah ha Delhi, U Nongsaiñ Hima u la ïoh ban ïakren kyrpang bad une u samla ha Dili haat, Delhi.
U Bah Marvel u la ïathuh ba ka jingeh ïa ki North East India ka dei ba ki briew ha Delhi ki kynnoh ïa ki briew kiba na Mizoram, Nagaland, Arunachal, Manipur bad Meghalaya ba ki dei ki China ne Nepal, katba ïa kiba na Assam kim da kynnoh than.
U la ïathuh ba na Meghalaya ki don palat 50 ngut kiba trei kum ki pulit ha nongbah Delhi.
“Ngi ju ïakynduh shisien shisnem haba khot da ka seng Khasi Students’ Union Delhi Unit” u la ong.
U la ïathuh ba shisien shisnem u ju leit shnong kata tang ha ka por tlang jong u bnai Nohprah ban rakhe Khristmas bad Snem Thymmai bad bahaïing bahasem.
Shuh shuh u la pyntip ba u la ïoh ban ïarap ïa kawei ka samla na Jaiñtia kaba shah thok ha uwei u briew lyngba ka jingithuh ha Facebook.
U la pyntip ba kata ka kynthei haba ka la ïakynduh bad uta u briew u la shu set ïa ka hapoh kamra haduh lai sngi.
“Nga la ïoh ban ïarap dei ha ka por ba ka la mih tuh na kamra ban sa leit shaw na surok bad mynta kane ka briew ka la sah beit sha shnong” u la ong.
Namar kata, u la kyntu ïa ki samla Khasi ba kim dei ban ngop kulmar ha ki briew bym ithuh haba ki wan sha Delhi hynrei ki dei ban wad jingtip bniah ban lait na ka jingeh hadien habud.
