Shillong, Naitung 12
U Myntri ka tnad Development of North Eastern Region (DoNER), u Joytiraditya Scindia ha ka Sngi Thohdieng u la ong ka tnad kan bteng ban ïatreilang bad ka Jylla ym tang ha ki projek ba kongsan hynrei ha ki liang bapher-bapher.
“Ka jingïalang ka la ïakren halor ki buit, ki saiñdur bad ka lynti ïaid nangne shakhmat na bynta ka Jylla bad ngin ïai bteng ban ïatreilang, ym tang ha ki katto-katne ki projek kiba long kongsan ïa ka Jylla, hynrei ha ka liang ka ‘Macro-Strategy’ na bynta ka Jylla, da kaba buh jingmut lang ïa kiwei-kiwei ki Jylla hapoh ka Thaiñ Shatei Lam Mihngi, ki Jylla bad Union Territory hapoh India kumjuh ki ri marjan jong ngi,” la ong u Scindia haba kren sha ki lad pathai khubor hadien ka jingïalang khmih bniah halor ka jingpyntreikam ïa ki projek bapher-bapher hapoh ka thaiñ.
Utei u Myntri Sorkar Pdeng u la ong, “Ngin peit ruh ha ka liang ki kam khaïi bad ki lad pynïasoh bar-ri. Kumta ki don shibun kiei-kiei kiba ngi la ïakren kum ka jingsdang mynta ka sngi haba ïadei bad ka jingtei kaba ngin hap pynleit jingmut bad nga kyrmen ban trei ha kane ka bynta bad u Myntri Rangbah ka Jylla, u Conrad K. Sangma ha ki sngi ban wan.”
U Scindia u la ïathuh ruh ba ka jingïalang ha kane ka sngi ka la ïakren halor ka lynti nangne shakhmat kaba ka Meghalaya ka thmu ban shim hapoh ka jingïalam u Myntri Rangbah ka Jylla.
“Ïa nga, ka la long jingïalang kaba kit jingmut bha kaba ngi la kdew shai ha kiba bun ki liang haba ïadei bad ka Meghalaya,” u la ong.
Haba kdew ïa ki sienjam kiba u Myntri Rangbah bad ka Sorkar jong u ka la shim halor ka lynti ïaid ban pyntyllun ïa ki kam bad ka roi ka par hapoh ka Jylla, u la ong ba kum u Myntri ka tnad DoNER, u la pynsngew ïa ka lynti kaba dei ban shim ïa ka Thaiñ Shatei Lam Mihngi da kaba phai khmat sha man la ki Jylla hapoh ka thaiñ.
“Ngi la ïakren ruh halor kumno ban phai khmat sha ka nongbah bathymmai katkum ka juk stad mynta ha ryngkat ka jingkhlaiñ ki riti-dustur jong ngi – nalor kane, ban pynleit jingmut ha ki bynta kum ki kam jngoh kai, ka rep ka riang, IT bad kumno ngin tei ban ïaid shakhmat haba ïadei bad kine,” la ong u Scindia.
