Khliehriat, Naitung:
Ka Dorbar Shnong Chiehruphi, East Jaiñtia Hills District ka la pynpaw ïa ka jingpyrshah kaba jur ïa ka jingpynbeit thymmai ïa ki konstitwensi jong ki MDC Konstitwensi, kaba la ïaid shaid-shaid ka jingpynsngew paidbah jong ka Delimitation Committee jong ka JHADC.
“Na ka liang jong ngi ka shnong Chiehruphi ngi pyrshah jur ïa kane ka jingleh jong ka JHADC namarba ka la pynkynriah ïa ngi na ka Narpuh MDC Konstitwensi bad ka la pynïasoh ïa ngi sha ka Sutnga-Nongkhlieh MDC Konstitwensi,” la ong ka kyrwoh na ka dorbar pyllun.
Ka dorbar pyllun jong ka shnong kaba la long ha ka 08/07/24, ha kaba u paid nongshong shnong jong ka shnong khlem ka jingartatien da kawei ka jingmut la rai ban pyrshah beit ïa ka jingpynïasoh jong ka JHADC ïa ka shnong sha katei ka konstitwensi thymmai.
Namar kata, ki la kyrpad ïa ka delimitation committee jong ka JHADC ba kan sngewbha ban pynneh pynsah shwa ïa ka Chiehruphi ha ka Narpuh Konstitwensi. Lada ka JHADC kam sngap satia ïa ka jingkyrpad jong ka shnong khlem pep yn kyntait shisyndon ban ïashim bynta ha ka jingthep ‘vote’ ilekshon MDC ka ban wan.
