Jowai, Naitung:
Ka Delimitation Committee jong ka Jaiñtia Hills Autonomous District Council (JHADC) ha ka 8 tarik Naitung ka la sdang ïa ka jingpynsngew paidbah na ka bynta ban ïakren ïa ka jingtyrwa ban pynbeit thymmai ïa ki Constituency.
Ïa kane ka jingpynsngew paidbah la sdang nyngkong ha Amlarem, West Jaiñtia Hills District na ka bynta ki lai tylli ki Constituency kata ka War East, ka War West bad War Central kaba la pynlong ha Syiem Jingsuk Parish Hall Amlarem.
U Waheh Shnong Pdengkarong u Bah Kolmen Pohshna uba la mihkhmat na ka bynta ki lai tylli ki shnong ka Amlarang, Amsyrwa bad Pdengkarong, u la kyrpad ïa ka Delimitation Committee ban phiah bad pynrung biang ïa kine ki lai tylli ki shnong hapoh ka War East Constituency khnang ba kan wanrah ka shongsuk shongsaiñ hapoh ka Elaka Satpator.
U Pormi Pakynteiñ u la ai jingmut ïa ka Committee ban kynthup ïa ki lai tylli ki shnong ka Pdengshakap, Satpator bad Trangblang hapoh kajuh ka Elaka Satpator.
U Waheh Shnong Umladkhur u Dapoi Lyngdoh bad Emlangki Dkhar ki la kyrpad ban pynneh ïa ka shnong Umladkhur hapoh kajuh ka constituency kumba ju long mynshwa kata hapoh ka Jowai South kumjuh u Donbok Lamurong ruh na ka shnong Thangbuli u la ai jingmut ban pynneh biang ïa ka Thangbuli hapoh ka Jowai South.
