Shah rat ka skul RCLP Mawlynrei ha ka ‘erïong haduh ban da julor khait, leit ai jingïarap u CEM

Shillong, Naitung:

Hadien katto-katne bnai ba ka ‘erïong ka la rat bad pynjulor ïa ki ïing ki sem kiba don ha Mawlynrei, sa shisien pat ha kane ka sien kaba mynta hapoh katei ka konstitwensi, ki ïing ki sem kiba don ha Mawlynrei hapoh ka shnong Pepbah ki la ngat biang ha kane ka apot ha ka 5 tarik u Naitung.

Ha kane ka jingjia kawei ka skul ïa kaba la tip kum ka RCLP School kaba hap hapoh ka jingpynïaid jong ka Balang Katholik jong ka Parish Laitkor, kaba dei kaba la seng kyrpang na ka bynta ki duk ki suk ha kane ka shnong bad kaba sngewsih ka long ba ha ka miet jong ka Sngi Yhohdieng, katei ka skul la shah rat lut ki tin sop ïing, ki dieng, bad ka la pynjulor ruh ïa ki kynroh.

U MDC kane ka thaiñ uba dei artad u CEM ka KHADC, u Bah Pynïaid Sing Syiem u la leit ban jngoh ïa kane ka ïing skul ha ryngkat ka jingdonlang ki nongïalam shnong, ki nongkitkam ka Block bad kiwei kiwei.

Ha kaba ïadei bad kane ka jingjia, na ka liang u CEM u la pyntip ba la dep ban ai ïa ki jingthoh sha ka sorkar bad la lah ban pynpoi shuwa ïa ki tiar ki tar kiba donkam ban pynbha ïa kane ka skul. Haba ai jingkren ha katei ka sngi, u Bah Pynïaid Sing Syiem u la ong ba kane ka jingjia ka la buh jingeh ïa ki nonghikai bad ki khynnah skul katei ka skul ba kin ïoh ban shong ha ki kamra klas ban sngap ïa ki jingai jinghikai bad kumta kum u nongmihkhmat ka thaiñ, un ïaleh katba lah ban wanrah jingïarap kaba kham kloi na ka bynta ban maramot ïa kane ka jingjulor.

U la ai ka jingïaroh ruh ïa ka sorkar MDA-2.0 kaba la ïalam da ka seng NPP kaba la rai ban pynpoi ïa ki lad jingïarap sha kino-kino ki longïing-longsem, ki skul ne ki balang kiba mad ha ka jingshah lynshop ha ki bor mariang hapoh ka 48 kynta.

“Nga kwah ba phin nym sngewthuh bakla, ha ka ilekshon ki ju don kiba rem bad kiba jop, hynrei ka mynsiem shakri jong nga shimet kam pat duh namar da ka lah duh ngam wan shuh hi re shane hynrei namar ba ka mynsiem shakri kam pat duh ba ngan sa don hangne. Lada long tang kum u riewshimet ne u ‘riewpaidbah, ngi lah ban ai ka kti kamon ka kti kadiang ban shakri”, la ong u Bah Pynïaid.

Na ka liang ki paid ‘riewngeit bad ki nongshong shnong, ki la mih ryntih lang ban kner ïa ki lad jingïarap bad ban shna pynbha ïa kane ka skul.