Shillong, Naitung 12
Ka Khadi and Village Industries Commission (KVIC) ka la thaw ïa ka rekod bathymmai hapoh ka jingïalam jong u Myntri Rangbahduh ka ri India u Narendra Modi ha kaba ka jingïoh jingkot jong ka Khadi and Village Industries ka la tam ïa ka T. 1.5 lak klur tyngka ha ka sien banyngkong.
Ha u kyrwoh khubor ba la phah da ka KVIC, la ong ba ha ka jingpynmih ïa ki jingkheiñ ba shipor na ka bynta u snem 2023-24, ka la don ka jingkiew kaba da 315% ha ka jingpynmih ïa ki mar bad 400% ha ka jingdie ha ki 10 snem. Nalorkata, la ong ba ka la don ka jingkiew da 81% ha ka jingpynmih kam thymmai ha ki 10 snem.
Shuh shuh ha ki 10 snem ba la dep, ka la don ka jingkiew da 87.23% ha ka kam khaïi jong ka Khadi bad Gramodyog Bhawan ha New Delhi.
U kyrwoh khubor u la pyntip ruh ba u Chairman ka KVIC, u Manoj Kumar, u la ong ba ka jingkular jong u Modi ka la rah ïa ka jingdie ki mar Khadi sha ki kyrdan bathymmai.
Nalorkata, ka Khadi bad Village Industries Commission (KVIC) hapoh ka Ministry jong Ka Micro Small & Medium Enterprises (MSME), Sorkar India, ka la thaw ïa ka rekod bathymmai ha ka jingdie ïa ki mar bad ka jingpynmih kam bathymmai ha u snem mang tyngka 2023-24.
U Kumar, haba pynmih ïa ki jingkheiñ ba shipor jong ka snem mang tyngka 2023-24 ha New Delhi, u la ong ba ki jingkheiñ ki la tam ïa baroh ki jingkheiñ ba mynshwa. U la ong ba ka jingkiew kaba 499.69% (kumba 500%) ha ka jingdie 414.79% (kumba 415%) ha ka jingpynmih, 80.96% (kumba 81%) ha ka jingpynmih kam thymmai haba ïanujor bad u snem mang tyngka 2013-14.
Ha ka snem mang tyngka 2022-23 ka la don ka jingkiew kaba 332.14% ha ka jingdie 267.52% na ka jingpynmih ïa ki mar bad 69.75% ha ka jingpynmih kam haba ïanujor bad u snem 2013-14.
Kane ka jingtreikam kaba phylla jong ka KVIC ka la noh synñiang shibun ban pynurlong ïa ka jingthmu jong ka Ri India ka ban sa kiew ha u snem 2047 bad ban pynlong ïa ka ri India kaba lai ha ka liang ka ïoh ka kot ha ka pyrthei baroh kawei ha ka sien banyngkong. Ha ka histori jong ka jinglaitluid jong ka ri India ka jingdie ïa ki mar KVIC ka la kot sha ka T. 1.55 lak klur ha u snem mang tyngka 2023-24. Ka jingkheiñ mang tyngka jong u snem 2022-23 ka long T. 1.34 lak klur.
Ha ki 10 snem ba la dep jong ka sorkar u Modi, ka jingdie ïa ki mar Khadi bad Village Industry ba la shna da ki nongtrei kti ha ki jaka nongkyndong kiba la long 31154.20 klur tyngka ha ka snem mang tyngka 2013-14, ki la kiew sha ka kyrdan kaba heh tam kaba long kumba 155673.12 klur tyngka ha u snem mang tyngka 2023-24 kaba long ka jingjop kaba khraw tam haduh mynta.
Ha u snem mang tyngka 2023-24 halor ka jingpyrshang jong ka KVIC ka la lah ban pynmih 10.17 lak tylli ki kam thymmai ha ki jaka nongkyndong bad ka la pynkhlaiñ shuh shuh ïa ka ïoh ka kot jong ka Ri India.
