Nongstoiñ, Naitung 12
Ka HYC Mawkaton Unit kaba hap ha ka HYC Lai Lyngdoh Circle,West Khasi Hills District ka la pynpaw ka jingsngewbynñiaw halor ka jingtrei torti bad tang dep jong u kontraktor uba pyntrei ïa ka surok PMGSY na Mawkaton haduh Nongkasen ha kaba kane ka la wanrah ka jingtwa khyndew bad pynlong ïa ka jingsahkut ha ka ïaid ka ïeng ki kali.
“Hooid ka dei ka por lyiur, hynrei ka jingtrei torti bad tang dep u kontraktor ka la wanrah ka jingtwa ka jingbym lah ïaid shuh ki kali rit bad kali heh, kaba la wanrah ka jingeh ïa ka dong ka thaiñ bad ïa ka khamtam kane ka thaiñ Lai Lyngdoh baroh kawei,” la ong ki nongkitkam ka HYC.
Halor kane ka bynta, ka HYC ka la leit ban buh jingthoh ha PWD Road, Markasa Division bad ka la leit ïakynduh ïa u Manager katei ka surok hynrei ym don jingpatiaw.
Ka HYC ka kyntu ïa ki bor Sorkar ban da pynlong ïa ka jingjurip namar lada long ha katei ka rukom, ka shu long lehnohei ïa ka pisa paidbah da kaba ïoh mano-re- mano katba ka jingduhnong ka long ïa ki paidbah.
Ha kajuh ka por, ka HYC ka kyntu ïa u kontraktor ban trei bha bad kham sted ïa ka kam da kaba ki la bynrap ruh ba ïa ka jingkieng ha Umlipoi lah trei naduh bnai Lber hynrei haduh mynta ym pat dep bad kane ka paw ïa ka jinglehsting bad ka pynjynjar ïa ki paidbah ka thaiñ.
Lada ka Sorkar ne ka PWD (Road) kam shimkhia, ka HYC kan sa shim kiwei pat ki sienjam, la pynkut ka kyrwoh khubor na u Samla Banlam Lyngkhoi, President HYC Mawkaton Unit.
