Shillong, Nailar 23
Ka Meghalaya Pradesh Congress Committee (MPCC) ha ka Sngi Saitjaiñ ka la pynrem jur halor ki jingjia ba dang shen ha ka Jylla bad kynnoh ïa ka Sorkar NPP-BJP ban shim ka jingkitkhlieh halor ka jingbym lah ban pynneh-pynsah ïa ka shongsuk shong shngaiñ.
Ha ka kyrwoh khubor, ka MPCC ka la ong ba ka pynrem jur ïa baroh ki jingthombor, jingpyntieng bad jingpynthut kiba la wanrah ïa ka jingshong syier, ka jingeh bad ka jingjynjar ïa ki paidbah ka nongbah Shillong bad Meghalaya.
“Ha kajuh ka por, ka MPCC ka kynnoh ba ka Sorkar Jylla ba la ïalam da ka NPP-BJP ka dei ban shim ka jingkitkhlieh namar ka jingbym lah jong ka ban khmih lynti lypa ïa ka jinglong-jingman, ban ïada ïa ki nongshong shnong, ban pynneh-pynsah ïa ka shongsuk shong shngaiñ, bad ban khanglad ïa ka jingnang jur jong ki jingïakynad, kynthup ha shilynter u pud u sam jong ka Meghalaya bad Assam,” ong ka kyrwoh.
“Watla ka don ïa ki bor syntiat, ki bor pynïaid kam bad ka jingmaham kaba biang haba ïadei bad ki jingïakynad kiba mih, hynrei ka Sorkar kam shym la lah ban shim ki sienjam da ka jingshimkhia, jingsngew bad jingpynkhreh kaba ka jinglong-jingman ka dawa,” ong ka MPCC.
Ka la ong ba ki nongshong shnong ba lui-lui ki hap ban mad jingeh, ha kaba ki nongleit-nongwan ki don ka jingbym sngew shngain, ki nongjngohkai pyrthei kiba hap ban pynsangeh noh ïa ki ‘booking’ bad ki nongshim bynta ha ki kam jngohkai pyrthei ki mad ïa ka jingduhnong.
“Ki nongjngohkai pyrthei ki la pynsangeh noh ïa ki ‘booking’, kaba la wanrah ïa ka jingduhnong kaba khraw ïa ki ‘Hotel’, ki ‘Homestay’, ki nongpynïaid taksi, ki jaka bam, ki dukan bad ki hajar tylli ki longïing kiba shaniah ha ki kam jngohkai pyrthei. Ki nongpang bad ki ‘Hospital’ ki ïakynduh jingeh namar ka leit ka wan bad ka jingpynpoi biang por ïa ki dawai-dashin bad kiwei-kiwei ki mar donkam ka la shah pynthut,” la ong ka kyrwoh.
Haba pynpaw ïa ka jingsngewkhia halor ka jinglong-jingman ha khappud, ka seng ka la ong, “Ki kam kiba hap ban phikir bha hapdeng ki Jylla ki donkam ïa ka jingïalam kaba la ih, ka jingïakren kaba ïai bteng bad ka jingtuklar ha ka por kaba biang. Ym dei ban ailad satia ïa ki ban nang jur shuh-shuh namar ka jingbym shimkhia jong ka bor ba dei kmih, ka jingkheiñ saiñ pyrthei ne ka jingbym don ka jingshimkhia.”
Na ka liang ka MPCC, ka la kynnoh ba ka Sorkar ka la pyrshang ban buhrieh ïa ki jingbym biang jong ka da ki jingpynbna paidbah.
“Ki jingkynnoh bamsap, ka jingbym shai bad ka kolshor ban kular khlem da pyntreikam hok ka la pyntlot suki-suki ïa ka jingshaniah jong ki paidbah. Haba ka synshar-khadar kam shim lypa ki lad jingïada hashuwa ban mih kiei-kiei, dei ki nongshong shnong ba lui-lui kiba mad jingeh ha kaba kut,” ka la ong.
“Hynrei ban pynneh-pynsah ïa ka shongsuk shong shngaiñ bad ban ïada ïa uwei-pa-uwei u nongshong shnong ka dei ka kamram ba kongsan jong ka Sorkar ba la jied. Ka Sorkar kam lah ban shu pynrem ïa ki jingjia hadien ba ki la jia. Ka kamram jong ka ka long ban khmih lynti lypa, ban khang lad, ban ïada bad ban leh eiei,” la ong ka MPCC.
Shuh shuh ka seng ka la dawa na ka Sorkar ban wanrah biang mardor ïa ka jingshaniah, ban pyntikna ïa ka leit ka wan ba khlem jingthut jong ki dawai-dashin bad ki mar ba kongsan, ban ai jingshngaiñ ïa ki nongleit-nongwan bad ki nongjngohkai pyrthei, bad ban shimkhia ïa ka kam khappud lyngba ka jingïakren kaba don jingkitkhlieh.
