Shillong, Nailar 23
Ka Shillong All Faiths Forum (SAFF), ha ka jingïalang kaba la long ha ka Sngi Saitjaiñ, ka la ïamir jingmut halor ka jinglong-jingman kaba mynta ha Shillong bad ki jingeh bad ka Assam kiba mih na ka jingshah thombor jong ki briew ba lui-lui, ki nongwan jngohkai pyrthei, ka jingpynjulor ïa ki kali kynthup ïa ki mot dur jong ki ‘riewkhraw ka ri bad kiwei-kiwei.
Ka seng ka la kdew ba ki kam thombor kim lah satia ban long ka lad jingpynbeit ha ka ban weng ïa kano-kano ka jingeh, da kaba ban jur halor ka jingdonkam jong ka jingïakren bad jingïatreilang kum ka lynti ka ban lam sha ka jingpynbeit kaba ïasuk haba ïadei bad ki mat bapher-bapher kiba donkam ban pynbeit.
Na ka liang ka SAFF, ka kyrpad ruh ïa kito kiba don ka jingasngewkhia, ha Meghalaya bad Assam kumjuh, ban sdang ïa ki sienjam kiba manbha ban pyntikna ïa ka jingsuk kaba neh na ka bynta ban wanrah biang ïa ka jinglong-jingman kumba ju long, na ka bynta ka jingmyntoi ki paidbah ba bun balang jong baroh ar tylli ki Jylla ba marjan.
Kane ka long ka kyrwoh na u Asstt Secretary ka SAFF, u Arup Barua.
