Shillong, Nailar 23
U Nongïalam ka Liang Pyrshah Dr. Mukul Sangma ha ka sngi Thohdieng, u la kynnoh ïa ka Sorkar Jylla halor ka jingsniew ka suk ka sain ha Shillong hadien jong ka bike rally ka KSU kaba la kylla sha ki kam thombor, bad pynbud da ki jingjia kawang petrol bom bad thang kali.
U Mukul u la ong ba kine ki kam thombor kim dei kiba shu jia syndet-syndet hynrei ki dei namar ka jingbitar jong ki Sengbhalang namar ka jingjied ka Sorkar ban sngap jar ïa ki mat bala sahteng la slem jong ki.
“Lada phi peit bha ïa ka jingsdang bad kumno ka poi sha kaba kut ha ka sngi ba sdang kane ka jingjia, ngi la ïakynduh ïa kum kine ki jingeh ha ki por bala leit noh haba ki jingdawa ki mih na ka bynta ka bha ka miat ki paidbah da ki kynhun bapher-bapher bad sengbhalang,” u la ong.
“Ka long kaba donkam ïa ka Sorkar ban shimkhia ïa man ki jingdawa. Hato ka Sorkar kam don ha ka khep ban sngewthuh ïa ka jingheh jong ka jingbitar kaban long ka jingmih kaba kut jong ka jingbym sngewthuh ha ka por ba pynsngew ïa kine ki jingeh,” u la ong.
Haba shim ïa ka jingjia ba 19 tarik kum ka jingpulom ba pura ha ka jingtreikam ki bor Sorkar, u la ong ba ka Sorkar ka don pahuh ïa ka por bad ki briew ban pyrkhat lypa ïa ka jingmih ki jingkulmar.
“Kam lah long ïa ka Sorkar ban tip ïa kaei kaba jia ha ka sngi ba jia kane ka jingjia? Lada ïa ka jingbit la dep ban ai na ka bynta ka rally, hato kam donkam mo ban pynmih jingbthah sha ki paidbah? Ka Sorkar ka don ïa baroh ki kor ki bor ban lum ïa ki jingtip bad ban buh lypa ïa ki lad jingïada. Kaei kaba jia kam dei satia ban jia,” ong u Mukul.
U Mukul uba dei ruh u u Myntri Rangbah barim ka Jylla u la maham pyrshah ïa ka jingpynman ïa kane ka jingjia kum ka jingïakynad hapdeng ki jaidbynriew lane hapdeng ka Meghalaya bad Assam.
“Ka long kaba donkam bha ban nym ailad ïa kane ka jingjia ban pynwandur ha ka rukom kaba lah ban ktah na baroh ki liang. Kam dei ka jingïakajia hapdeng ki briew ka Meghalaya bad Assam. Ka dei ka jingjia ba bym sngewtynnad kaba jia namar ka jingpulom treikam ka Sorkar Jylla,” u la ong.
Halor ka jingshah khang ki kali ha khappud Assam-Meghalaya, u Mukul u la ong ba kane ka jinglong jingman kam wanrah satia ïa ka jingbha ïa ka Meghalaya.
