Shillong, Nailar 23
Ha ka jingmih ki kynrum kynram ha kane ka Jylla, kaba dangïai bteng haduh mynta, na ka liang ka Operation Clean – Up, Shillong, ha ka nohphai sngi jong ka 22 tarik u Nailar, 2026, ka la pynlong ïa ka prokram kyrpang kaba la tip kum ka Candlelight Peace Vigil, ha phyllaw ka State Central Library, Shillong.
Ka jingthmu jong kane ka jingïalang, ka long ban wanrah biang ïa ka shongsuk shongsaiñ ha kane ka jylla bad kumjuh ruh ba kan don ka jingïapynbeit hapdeng ki ar jylla, kata ka Meghalaya bad Assam halor ka jingïaid kali.
Ha kane ka jingïalang la lah ban sakhi ïa ka jingwan ïashim bynta da ki phew ngut ki nongshong shnong ba kynthup naduh ki riew pawkhmat, ki riew rangbah, ki samla, nalor kiwei-kiwei pat ki paidbah.
Haba kren ha kane ka janmiet, ki nongkren ki la pynpaw ka jingsngewsih halor ka jinglong jingmankaba dangbteng hapdeng ki ar jylla Assam bad Meghalaya.
Ki la ong ba ha ka jingïakhih ka ju don beit, kata ka jingjulor ne ka jingkulmar hynrei ngim dei pat ban shi kabu ban shu pynpait pynpra ïa ki kali jong kiwei bad ban pynymynsaw ïa ki paidbah.
“Ngi ïohi ba haba don ki jingïakhih ka ju don beit ka jinghuri hura hynrei ngin nym pdiang ïakata. Balei ngi wan hangne ka long ba ngim lah ban shu im beit tang ka jingsyir mynsiem, ha ka jingtieng,” ki la ong.
Shuh shuh ki la bynrap ruh da kaba ong ba ki lah ban ïakhih ban dawa na ka Sorkar haba ïadei bad ki mat hynrei kita kiba rah ïa ka lama kim lah ban shu leh katba ki mon.
