Shillong, Nailar 23
Ka Hill Farmers Union (HFU) hapoh ka jingïalam u General Secretary, Bah Allfondbirth Kharsyntiew bad u Publicity Secretary, u Samla Rangtei Pyngrope bad ka jingïadonlang u General Secretary Mawsynram Block Bah Trustarwell Pde, ki la ïoh ban pynskhem ïa ki nongkitkam ba thymmai jong ka HFU Phlangwanbroi -Dangar Border Circle.
Ïa kine ki nongïalam ka seng, la pynskhem ha ka sngi Saitjaiñ jong ka taïew.
Ka jingphai khmat ki samla ba la nang la stad ban pynïasoh sha ka seng HFU, kadei namar ba ki ïohi ïa ki jingeh ba ki ïakynduh ha ki thaiñ khappud (border)
Haba ïoh ban ïakren bad ki nongrep ka thaiñ, ki la pynsngew ba ka don ka jingduh mynsiem jong ki nongrep ha baroh ki liang ka jinghiar dor palat jong ki mar-rep, kaba man la ka por, kaba pynkutlad ïa u nongrep.
Ki nongrep ha ka thaiñ Mawsynsam Border, ki la pynpaw ruh ïa ka jingsngewkhia halor ka jingïap jong ki sniang, kaba la sar lut plaiñ da ka jingwan jong ka khlam bad kane ka ktah shisha ïa ka ïing ka sem jong ki nongri jingri.
Ki nongkitkam kiba la shah pynkhamti ki kynthup ïa u Samla Vicky Boy Malai Syiem, President,Vice President, u Jonison Kynther, General Secretary, Alexander Wanniang, Assistant General Secretary, Jewel Shylla, Treasurer, Kong Pdianghun Kynter bad 15 ngut ki dkhot na ki shnong bapher-bapher, kiba don ha ki jaka khappud.
U Bah Allfondbirth Kharsyntiew u la ai mynsiem ïa ki khun samla bad kiba dei ruh ki khun jong ki nongrep bad ong “Watla ngi la nang la stad ruh, kynmaw ba ngim dei ban sngewlehraiñ ba ong, ba ngi dei ki khun jong u nongrep”.
U la ïawer ruh ïa ki khun Samla, kiba dei na ka ïing jong ki nongrep, ba kidei ban pynïatylli ïa u nongrep ha ka Jylla hi baroh kawei, kata kan sa long ka bor kaba khlaiñ ban weng ïa ki jingeh jong ki nongrep.
