Shillong, Nailar 23
Ha ka nohphai sngi jong ka 23 tarik u Nailar 2026, ka la don ka jingsaphriang jong kawei ka durkhih (video) ha ki rynsan social media, kaba pyni ba ki briew ki la kynjat dusmon ïa ar ngut ki shynrang briew, watla ha ka jingdon lang ki bor pulit halor ka jingkynnoh ba ki dei ki nongtuh.
Katkum ka durkhih la ïohi, ba ïa uwei napdeng jong ki, ki briew ki la tan da u tyllai kiba la teh ruh ïa ki kti bad hadien la thep noh ha ka kali jong ki pulit ka thanad Mawngap.
Shuh shuh la ïoh pdiang ruh ki durkhih, ba la don lang kawei ka kynthei kaba la don lypa ha ka kali ki pulit, ha ka por ba la thep ïa 2 ngut ki shynrang.
Katkum ki khubor ba la ïoh lum la kynnoh ba katei ka kynthei bad kitei ki ar ngut ki shynrang, ki dei ki nongtuh, ha kaba ki nongshong shnong ka 11 Mer ki la ïoh bat ha ka por mynstep.
Kawei ka durkhih, kata shuwa ban poi ki pulit la ïohi ba ki paidbah ki la risa ha ka por ba ka la don ka jingdaiñ da u maw hï ki kti ki kjat jong ki ar ngut ki shynrang, kiba la kynnoh ba ki dei ki nongtuh.
Nalorkata, la ïohi ruh ba ki briew ki la pynsum da ka umsoh ïa kitei ki shynrang bad ban kynjat ruh kumjuh.
Ha ka por ba la thep sha ka kali ki pulit, ki briew ki la risa, bad kynjat biang artad da kaba ong “leit suk”.
