New Delhi, Naitung 12
Ka Myntri tnad rep ka riang ka Sorkar Jylla, Dr Mazel Ampareen Lyngdoh ka la ong ba na ka liang ka sorkar ka la pynlong ïa kane ka prokram die sohtrun mynshem snem bad ka jingthmu ka long ban ïarap ïa ki nongrep khamtam ïa u sohtrun, bad ka jingïohlad biang jong ka sorkar ban pynlong ïa ka ïew die sohtrun mynta u snem ha Dilli Haat, Delhi namar ka long ka ïew kaba baroh ki jylla bapher-bapher ki ïoh jaka ban pyninam ïa la ki jingthung jingthep naduh ki soh ki pai bad kiwei kiwei.
Ka Kong Ampareen ka la poi ha ïew die sohtrun ha ka Sngi Thohdieng ha Dilli Haat, Delhi ha ka por janmiet ban jngoh ïa ki dukan bad khatduh ka la sngap ruh ïa ki jingrwai ba la rwai da ki samla kiba wan na Meghalaya.
Ka Kong Ampareen ka la ong ba mynta u snem ka sorkar ka la ïalam lang ruh ïa ki nongrep bad ki nongpynmih ïa ki mar rep ha ryngkat ki briew kiba seng kam lajong ba kin ïohlad ban ïadie-ïathied bad pyninam ïa ki mar ki mata jong ki.
Na ka liang ka Kong Ampareen ka la ong ruh ba ka dap da ka mynsiem jong ka jingsngewkmen khamtam kum ka Myntri sorkar kaba dei peit ïa ka rep ka riang haba ki briew ha nongbah Delhi ki kwah ban mad ïa u sohtrun na ka jylla Meghalaya.
Ka la pyntip ba ka sorkar kan pyrshang ban wanrah ïa ki nongrep ba kin lah ban kamai jakpoh lada ïaid ïew u sohtrun shabar ka jylla.
Ka la ïathuh mynshem snem ïa u sohtrun ba die ha Delhi la lah ban rah ruh sha Dubai.
Nangta ka sorkar ka la mang pisa ban tip kumno ban pynïaid ïew ïa u sohtrun.
Ka la ïathuh ba ka sorkar ka don jingthmu ban pynïaid ïew ïa u sohtrun sha ki kompani ban shna biskit, shna cake, shna ice-cream, shna jingbam khyllung ruh.
