Shillong, Naitung 12
Ka Executive Member ka KHADC kaba peit ïa ka tnat Information Tech-nology, ka Kong Grace Mary Kharpuri ka la ong ba ym don jingtip ki don katno tylli ki kompiwtor ha ki slem treikam ka Council bad kam don satia ka jingthied kompiwtor thymmai ha u snem 2023-2024 lait noh tang ka jingthied ïa ki tiar kiba ju pyndonkam lang haba treikam lyngba ka kompiwtor (computer peripherals).
Ka Kong Kharpuri ka la ïathuh ïa kane ha Ïingdorbar KHADC haba jubab ïa ka jingkylli u MDC ka Sohra, u Bah Titosstarwell Chyne ha ka Sngi Thohdieng.
Ka la ïathuh ba ka la pan jingtip ban ïoh jing-kheiñ ki don katno tylli ki kor kompiwtor, hynrei kam shym la ïoh satia.
Ka la ong ba ka tip shai ba ki shlem treikam kiba don ki kompiwtor ki dei ha kamra treikam ki Executive Member bad jong ka tnat IT ka Council.
Kane ka EM ka la ong ruh ba kam ïoh jingshai bha wat haba die lilam ïa ki kompiwtor bad haba thied.
Kumta ka la ong ba ka jingthied kompiwtor thy-mmai kam don satia hynrei tang kaba thied ïa ki tiar kiba ju pyndonkam lang bad ki kompiwtor (computer peripherals) ka kot sha ka T. 20,21,950 jong u snem 2023-2024.
Na ka liang u CEM u Bah Pynïaid Sing Syiem ruh u la ong ba ka jingthied ïa ki kot sada bad kiwei ki tiar (stationeries) kiba pyndonkam ha ki kamra treikam jong ka Council, ka long T.19,20,512 ha u snem 2023-2024.
Ha kawei pat ka liang, u CEM u la ong ba ka Executive Committee ka la thaw ki lad ki lynti kumno ban kham pynbiang ïa ka rukom treikam hapoh ka Council ha kaba u la dep ïakren ruh ban ïoh ai jinghikai pyntbit ha MATI ïa ki ophisar ka Council ba kin kham tip kham shemphang ha ka rukom treikam.
