New Delhi, Naitung 14
U Myntri Rangbah ka Jylla, u Conrad K Sangma, u la pyntip ba ka sorkar jylla kan pynlong beit man u snem ïa ka ïew die sohtrun na Meghalaya ha Delhi kum shim bynta ban kyntiew ïa ki nongrep sohtrun hapoh ka jylla.
U Conrad u la wan ban pynhap pyrda ïa kane ïew die sohtrun ha Dilli Haat, Delhi kaba la kut ha ka Sngi U Blei ka 14 tarik Naitung 2024 bad sdang naduh ka 10 tarik Naitung 2024.
Ha kane ka sngi pynhap pyrda, u Conrad u la leit jurip ïa ki jaka die sohtrun bad leit sngap ruh ïa ki jingrwai ba la rwai da ki samla na Meghalaya.
Haba ai jingkren ha kane ka jingïalang, u Conrad u la pynpaw ka jingsngewkmen haba ka sorkar ka la bteng biang ban wan die sohtrun ha nongbah Delhi kaba la sdang mynshem snem. Kane ka long ka lad ban ïarap ïa sanphew hajar ngut ki nongrep sohtrun hapoh ka jylla kiba ju pynmih 35 metric ton ha ka shisnem.
“Ngi don jingkyrmen lyngba kane ka ïew ha Delhi kan ïarap ban pynkiew dor ïa u sohtrun namar ngi kwah ban kyntiew ruh ïa kiwei ki mar rep khnang ban lah ai jingmyntoi ïa ki nongrep” u la ong.
U la pyntip ruh ba ka sorkar ka la kyrshan ïa ki nongrwai trai jylla haduh 3,000 ngut lyngba ka Meghalaya Grassroots Music Program ban rwai ha ki restaurant, cafe, ki jaka jngohkai pyrthei.
Shuh shuh u la ong ba ki samla kiba dang khie ki donkam ka jingkyrshan bad ka sorkar ka la kyrshan ban ai jingkyrmen ïa ki.
